Azərbaycanda elektron siqaretlərin istifadəsi, idxalı, ixracı, istehsalı, topdan və pərakəndə satışı və satış məqsədilə saxlanılmasına görə yeni cərimələr müəyyənləşir.
"Operativ Məlumat Mərkəzi-OMM" xəbər verir ki, bununla bağlı İnzibati Xətalar Məcəlləsinə yeni maddələr əlavə edilir.
Milli Məclisin Hüquq siyasəti və dövlət quruculuğu komitəsinin bugünkü iclasında müzakirəyə çıxarılan sənədə əlavə edilən yeni maddəyə əsasən, elektron siqaretlərin və onların komponentlərinin qanunsuz dövriyyəsinə görə mallar müsadirə ediləcək.
Təklif edilən dəyişikliyə əsasən cərimələr aşağıdakı kimi tətbiq olunacaq:
Fiziki şəxslər 350 manatdan 500 manatadək, vəzifəli şəxslər 1650 manatdan 2 200 manatadək, hüquqi şəxslər isə 4 min manatdan 5 min manatadək məbləğdə cərimə ediləcəklər.
Qanun qəbul edildiyi təqdirdə, aprelin 1-dən qüvvəyə minməsi nəzərdə tutulur.
