Azərbaycanın kapital bazarında mənfi halları vurğulamadan, görmədən bu sahəni inkişaf etdirmək mümkün deyil.
"Operativ Məlumat Mərkəzi-OMM" xəbər verir ki, bunu yerli investisiya şirkətlərinin birinin direktor müavini Pərvanə Qasımova bildirib.
"Biz ötən il komandamızla bir sorğu keçirdik. Həmin sorğuda 100 nəfər iştirak etdi. Respondentlərə kapital bazarı ilə bağlı suallar verdik və nəticə o qədər də yaxşı olmadı. 99 % respondent bazar barədə məlumatsızdır. Mən bunu həmin şəxslərin maliyyə savadının olmaması ilə əlaqələndirməzdim. Bu nəticə ölkədə bu bazarın inkişaf etməməsindən xəbər verir. İnkişaf üçün bizə beynəlxalq standartlara uyğun olaraq qaydalar və yaxud sistem lazım deyil. Bizə yüksək etik qaydalara riayət edən, perspektivli və innovativ şirkətlər lazımdır. Həmin şirkətlər ki, investorlar onlara etimad edəcək. Bu gün mən kapital bazarının uğurunun və davamlılığının əsasını təşkil edən əsas aspektə – etimadın həlledici elementinə toxunmaq istərdim. Kapital bazarında etimadın yaradılması onun düzgün işləməsi, investorların inamının artırılması və maliyyə sisteminin ümumi bütövlüyünün təmin edilməsi üçün vacibdir", - deyə o qeyd edib.
