OMM Redaksiyası
Efiopiyada yeddi silahlı qrup Baş nazir Abiy Əhmədin hökumətini devirmək məqsədilə ittifaq yaradıb.
“Yaşamaq uğrunda Efiopiya Xalqları Qüvvələri Alyansı”na 2020–2022-ci illərdəki vətəndaş müharibəsində qarşı tərəflərdə döyüşmüş Tiqray Xalq Azadlıq Cəbhəsi (TPLF) və Amhara Fano Milli Hərəkatı da daxildir. Alyans ölkənin müxtəlif bölgələrindən olan qrupları birləşdirir. Bununla belə, üzvlər arasında ərazi və digər məsələlərlə bağlı fikir ayrılıqlarının qaldığı bildirilir.
Alyansın məqsədi
Fano lideri Zemena Kassinin oxuduğu və “Tigrai TV”nin yayımladığı bəyanatda ittifaq üzvlərinin “bu rejimi devirmək kimi tarixi məsuliyyət daşıdığı” qeyd olunub.
Qruplar hökuməti hakimiyyəti mərkəzləşdirməkdə və regionları siyasi baxımdan kənarda qoymaqda ittiham edir. Hökumət isə siyasi parçalanmaları və daxili münaqişələri aradan qaldırmaq üçün milli dialoq başladıldığını bildirir.
Eritreya ilə bağlı ittiham
Baş nazirin sözçüsü Billene Seyoum qrupların qonşu Eritreyanın maliyyə dəstəyi ilə əməkdaşlıq etdiyini deyib. Eritreya daha əvvəl də bu tip ittihamları dəfələrlə rədd edib.
“Son açıqlama Efiopiya hökumətinin dəfələrlə irəli sürdüyü iddiaları təsdiqləyir”, – Seyoum bildirib.
Fano 2020–2022-ci illərdə Tiqray müharibəsi zamanı federal hökumətin yanında TPLF-yə qarşı döyüşüb. Yüz minlərlə insanın ölümü ilə nəticələnən həmin münaqişə etnik motivli zorakılıq halları ilə müşayiət olunub. Daha sonra Fano Amhara bölgəsində federal hökumətə qarşı silahlı mübarizəyə başlayıb. 2023-cü ildən bu yana bölgədə minlərlə insanın öldüyü bildirilir.
İttifaqın gücü sual doğurur
Alyansa Oromiya, Afar və Benişanqul-Qumuz bölgələrindən olan qruplar da qoşulub. Bu addım federal və Tiqray qüvvələri arasında yeni toqquşmalar barədə məlumatların yayıldığı vaxta təsadüf edir.
May ayında TPLF Tiqrayın siyasi idarəçiliyi üzərində nəzarəti yenidən bərpa edib. Bu addım 2022-ci il sülh sazişinin pozulması kimi qiymətləndirilib. TPLF federal hökuməti razılaşmanın şərtlərini yerinə yetirməməkdə günahlandırıb.
Efiopiyanın media tənzimləyicisi isə bazar ertəsi xəbər qurumlarına “Tigrai TV”ni mənbə kimi istifadə etməyi qadağan edib.
