ABŞ kəşfiyyatının məlumatına əsasən, Çin yaxın bir neçə həftə ərzində İrana yeni hava hücumundan müdafiə (HHM) sistemləri tədarük etməyə hazırlaşır.
Bu barədə “Operativ Məlumat Mərkəzi-OMM” "Reuters" nəşrinə istinadən xəbər verir.
Bildirilib ki, Pekin təchizatın mənşəyini gizlətmək məqsədilə prosesi üçüncü ölkələr vasitəsilə yönləndirməyə çalışır. Bununla yanaşı, söhbətin MANPADS kimi daşınan hava hücumundan müdafiə raket komplekslərinin tədarükündən gedə biləcəyi qeyd olunub.
Xatırladaq ki, ABŞ və İsrail 28 fevralda İrana qarşı hərbi əməliyyatlara başlayıb. Nəticədə İranın Ali rəhbəri Əli Xamenei və bir sıra yüksək vəzifəli şəxslər öldürülüb. Bundan sonra İran, İsraillə yanaşı, ABŞ və müttəfiqlərinin hərbi bazalarının yerləşdiyi Səudiyyə Ərəbistanı, Qətər, Birləşmiş Ərəb Əmirlikləri, Oman, Bəhreyn, Küveyt, İraq və Kiprdə müəyyən etdiyi hədəflərə zərbələr endirməyə başlayıb.
8 apreldə isə İran ilə ABŞ və onların müttəfiqləri ikihəftəlik atəşkəs barədə razılığa gəliblər. Tərəflər arasındakı növbəti danışıqların 11 apreldə Pakistanda keçirilməsi planlaşdırılır.
