Kanada hakimiyyəti ABŞ və İran arasında mümkün razılaşmadan sonra Hörmüz boğazında gəmiçiliyin bərpasına dəstək verməyə hazır olduğunu açıqlayıb.
"Operativ Məlumat Mərkəzi-OMM"xəbər verir ki, bu barədə Kanadanın Baş naziri Mark Karni Fransada keçirilən Böyük Yeddiliyin (G7) sammitinə yola düşməzdən əvvəl bildirib.
Kanada lideri qeyd edib ki, ABŞ və İran arasında müqavilə imzalandıqdan sonra Ottavanın bu istiqamətdə necə yardım göstərə biləcəyini digər G7 liderləri ilə müzakirə etməyə hazırdır.
Qeyd edək ki, iyunun 15-nə keçən gecə ABŞ və İran nümayəndələri, eləcə də danışıqlarda vasitəçi kimi çıxış edən Pakistan tərəflər arasında anlaşma memorandumu üzrə razılaşmanı təsdiqləyiblər.
Memorandumun iyunun 19-da Cenevrədə imzalanması planlaşdırılır. Razılaşmaya əsasən, sənədin imzalanmasından sonra 60 günlük atəşkəs müddətində tərəflər digər məsələlərlə yanaşı, İranın nüvə proqramı ilə bağlı müzakirələr aparacaqlar.
