Pakistanda qar uçqunu, 10 nəfərdən xəbər yoxdur

Pakistanın Broad Peak dağında qar uçqunu baş verib.

"Operativ Məlumat Mərkəzi-OMM" xəbər verir ki, bununla bağlı xarici KİV məlumat yayıb.

Uçqun nəticəsində nepallı məşhur alpinist Nirmal Purjanın rəhbərlik etdiyi 10 nəfərlik ekspedisiya qrupundan xəbər alınmır.

Pakistan Alp Klubunun sosial şəbəkə hesabında yayılan açıqlamada Nirmal Purjanın rəhbərlik etdiyi qrupun ABŞ, Çin, Oman və Nepal vətəndaşı olan alpinistlərdən ibarət olduğu bildirilib.

Alpinistlərin tapılması üçün Pakistan hökuməti ilə əməkdaşlıq çərçivəsində bütün imkanların səfərbər edildiyi vurğulanıb.

Nirmal Purja bu ayın əvvəlində Pakistanın digər yüksək zirvələrindən olan Gasherbrum II dağına kifayət qədər oksigen ehtiyatı olmadan qalxaraq 8 min 35 metr yüksəklikdəki zirvəyə 57-ci çıxışını həyata keçirmişdi.

Purja dünyanın ən məşhur yüksək dağ alpinistlərindən biri hesab olunur və 8 min metrdən yüksək bütün 14 zirvəyə rekord müddətdə qalxması ilə tanınır.