Bolqarıstan sahillərində gəmi PUA hücumuna məruz qaldı, 11 dənizçi itkin düşdü

Bolqarıstan sahillərində pilotsuz uçuş aparatının hücumu nəticəsində gəmi batıb.

“Operativ Məlumat Mərkəzi-OMM” xəbər verir ki, bununla bağlı “Reuters” məlumat yayıb.

Bildirilib ki, hadisədən sonra gəmidə olan 11 dənizçi itkin düşüb, ekipajın beş üzvü isə xilas edilib.

Bolqarıstan hakimiyyəti gecə saatlarında iki yük gəmisinin pilotsuz uçuş aparatlarının hücumuna məruz qaldığını, onlardan birinin batdığını bildirib.

Bolqarıstan hücumlara görə Rusiyanı birbaşa ittiham etməsə də, ölkənin baş naziri Rumen Radev hadisələrin nəticələrinin Rusiyanın maraqlarına uyğun olduğunu qeyd edib.

"Bu, tamamilə qəbuledilməzdir: Bolqarıstanın ərazi sularının bilavasitə yaxınlığında daha bir hücum baş verib", - Radev bildirib.

Bolqarıstan mediasının məlumatına görə, hücuma məruz qalan gəmilərdən biri "Azov Concord" yük gəmisi olub.

Malta bayrağı altında üzən digər gəmi - "Chelsea 3" də gecə ərzində üç pilotsuz uçuş aparatının hücumuna məruz qalıb. Gəmidəki yeddi Ukrayna və səkkiz Azərbaycan vətəndaşının hamısı xilas edilib. Hadisə nəticəsində heç kim ciddi xəsarət almayıb.

Moskva hadisələrlə bağlı hələlik açıqlama verməyib, Ukrayna və Avropa İttifaqı isə hücumları pisləyib.