Birləşmiş Ərəb Əmirliklərində güclü yağışlar səbəbindən bəzi reyslər təxirə salınıb.
"Operativ Məlumat Mərkəzi-OMM" xəbər verir ki, Birləşmiş Ərəb Əmirliklərinin (BƏƏ) rəsmi agentliyi olan WAM-da yer alan xəbərə görə, leysan yağışlar paytaxt Abu Dabi və Dubay şəhərləri başda olmaqla müxtəlif bölgələrdə həyata mənfi təsir edib.
Güclü yağışlar səbəbindən küçə və prospektlər və bəzi avtomobillər su altında qalıb.
BƏƏ-nin hava yolu şirkətlərindən biri olan "Fly Dubai" əlverişsiz hava şəraiti səbəbindən bəzi reyslərini ləğv edərkən, bir çox reyslər də təxirə salınıb.
Digər tərəfdən, BƏƏ Futbol Federasiyası bu gün keçiriləcək bütün yerli futbol matçlarının təxirə salındığını açıqlayıb.
Bildirilib ki, ölkədə polis və yerli administrasiyalar hazırlıq vəziyyətindədir və yağışlar çərşənbə axşamı günorta saatlarına qədər davam edəcək.
