OMM Redaksiyası
Həftəsonları respublika əhəmiyyətli avtomobil yollarında nəqliyyat vasitələrinin sayının kəskin artması yol hərəkəti təhlükəsizliyinə xüsusi diqqət tələb edir.
“Operativ Məlumat Mərkəzi-OMM” xəbər verir ki, bu barədə Daxili İşlər Nazirliyinin Baş Dövlət Yol Polisi İdarəsi (BDYPİ) sürücülərə müraciətində bildirib.
Qeyd olunub ki, istirahət günlərində şəhərdənkənar istiqamətlərə, eləcə də turizm və istirahət zonalarına doğru intensiv hərəkət axını müşahidə olunur. Bu zaman baş verən yol-nəqliyyat hadisələrinin əsas səbəbləri sürücülərin tələskənliyi, diqqətsizliyi və yol şəraitini düzgün qiymətləndirməməsi ilə əlaqədardır.
Müraciətdə vurğulanıb ki, BDYPİ tərəfindən həftəsonları avtomobil yollarında nəzarət-profilaktik tədbirlər gücləndirilsə də, təhlükəsizliyin təmin olunması yalnız inzibati nəzarətlə məhdudlaşmır. Yollarda təhlükəsiz mühitin formalaşması hər bir sürücünün şəxsi məsuliyyətindən və sükan arxasında nümayiş etdirdiyi davranışdan asılıdır.
Baş Dövlət Yol Polisi İdarəsi sürücülərin diqqətinə çatdırıb ki, texniki cəhətdən nasaz nəqliyyat vasitəsi ilə yola çıxmaq, yorğun və yuxusuz halda avtomobil idarə etmək, ara məsafəsini gözləməmək, sürət həddini aşmaq, ötmə və manevr qaydalarını pozmaq yol-nəqliyyat hadisəsi riskini dəfələrlə artırır və ağır nəticələrə səbəb olur. Xüsusilə uzun məsafəli səfərlər zamanı fasilələr vermək, avtomobilin texniki vəziyyətini əvvəlcədən yoxlamaq və yol şəraitinə uyğun hərəkət etmək vacib hesab olunur.
