Nəsimi rayonu ərazisində “Chevrolet” markalı avtomobili idarə edən sürücü Ceyhun Qurbanov ictimai asayişi pozduğu, digər hərəkət iştirakçılarının həyatına təhlükə yaratdığı və polisin qanuni tələbinə tabe olmadığı üçün saxlanılıb.
"Operativ Məlumat Mərkəzi-OMM"-in məlumatına görə, sürücünün davranışları şübhə doğurduğundan onun tibbi müayinədən keçirilməsi təmin edilib. Müayinə nəticəsində C.Qurbanovun narkotik vasitələrin təsiri altında olduğu müəyyən edilib.
Faktla bağlı sürücü barəsində inzibati protokol tərtib olunaraq materiallar baxılması üçün məhkəməyə göndərilib. Məhkəmənin qərarı ilə Ceyhun Qurbanov 1 il müddətinə nəqliyyat vasitələrini idarə etmək hüququndan məhrum edilib, həmçinin 20 gün inzibati qaydada həbs cəzası alıb.
Bildirilib ki, Nəsimi Rayon Polis İdarəsinin Dövlət Yol Polisi Şöbəsi tərəfindən yol hərəkətinin təhlükəsizliyinin təmin edilməsi məqsədilə profilaktik tədbirlər davam etdirilir.
