OMM Redaksiyası
Bakı şəhərinə yağan güclü yağışların fəsadlarını aradan qaldırmaq və paytaxtın sanitar-təmizlik səviyyəsini bərpa etmək məqsədilə 11 aprel tarixində Bakı Şəhər İcra Hakimiyyəti tərəfindən genişmiqyaslı daxili iməclik keçirilib.
Bu barədə məlumat “Operativ Məlumat Mərkəzi-OMM”-ə Bakı Şəhər İcra Hakimiyyətindən verilib.
Keçirilən iməclik zamanı şəhər mərkəzindəki prospekt və küçələrlə yanaşı, paytaxt qəsəbələrinin də küçələri yuyulub və əsaslı təmizlik işləri görülüb. Səhər saatlarından etibarən kommunal təsərrüfat xidmətlərinin texnikası bitki və canlılara zərər verməyən xüsusi yuyucu maddələrlə küçələrin yuyulmasını icra edib.
Həmçinin səki kənarlarının, bordürlərin, işıq dirəklərinin, məhəccərlərin və parklardakı oturacaqların yuyulması həyata keçirilib. Həyət və yaşayış məhəllələrində təmizlik işləri görülüb, yol kənarlarındakı ictimai-iaşə və ticarət obyektlərinin vitrinləri təmizlənərək ətrafında səliqə-sahman yaradılıb.
Bakı Şəhər Yaşıllaşdırma Təsərrüfatı Birliyi əməkdaşları tərəfindən gün ərzində yol və prospektlərin kənarlarındakı ağacların üzərinə yığılan toz-torpaq yuyulub. Yaşıllıqlara aqrotexniki qulluq göstərilib, zədələnən budaqlar budanıb və əraziyə müxtəlif rəngli güllərdən ibarət yeni kompozisiyalar əkilib.
Ümumilikdə, paytaxtın bütün rayonlarını əhatə edən bu genişmiqyaslı təmizlik işləri yağan yağışların fəsadlarının tam aradan qaldırılmasına və Bakı şəhərinin sanitar vəziyyətinin daha da yüksəldilməsinə mühüm töhfə verib.
