Bu gün saat 11:18 radələrində Bakı metropoliteninin "İçərişəhər–Sahil" mənzilində Qırmızı xətt üzrə hərəkət edən qatarda texniki nasazlıq qeydə alınıb.
Bu barədə "Operativ Məlumat Mərkəzi-OMM"-ə "Bakı Metropoliteni" QSC-dən rəsmi məlumat verilib.
Qurumdan bildirilib ki, texniki baxışın keçirilməsinə zərurət yarandığından, normativ tələblərə uyğun olaraq sərnişinlər "Sahil" stansiyasında düşürülüb. Hazırda nasaz qatar köməkçi qatar vasitəsilə xətdən çıxarılır. Bu səbəbdən Qırmızı və Yaşıl xətlərdə qatarların hərəkətində gecikmələr müşahidə olunur.
Qeyd edək ki, Bənövşəyi xətdə, eləcə də "Cəfər Cabbarlı-Xətai" və "Həzi Aslanov-Əhmədli" mənzillərində qatarlar qrafik üzrə hərəkət edir.
"Sərnişinlərə göstərdikləri anlayış üçün təşəkkür edirik", - deyə məlumatda vurğulanıb.
