Azərbaycanda fevralın 27-si saat 15:00-a olan faktiki hava məlumatına əsasən, ölkə ərazisində yağıntılı və küləkli hava şəraiti müşahidə olunur.
Bu barədə “Operativ Məlumat Mərkəzi-OMM"-ə Milli Hidrometeorologiya Xidmətindən məlumat verilib.
Bildirilib ki, bəzi yerlərdə şərq küləyi əsir. Küləyin maksimal sürəti Gəncədə 28, Naftalan və Şəmkirdə 24, Goranboyda 23, Culfa, eyni zamanda Bakıda və Abşeron yarımadasında 21 m/s-dək güclənir.
Həmçinin Salyan, Sabirabad, Tovuz və Neftçalada 20, Salyan, Şəki və İsmayıllıda 18, Ağstafa, Qobustan və Hacıqabulda 16, Şamaxıda 15 m/s qeydə alınıb.
Naxçıvan, Şərur, Şahbuz, Culfa, Sədərək, Naftalan, Şabran, Qusar, Xaçmaz, Goranboy, Tərtər, Bərdə, Beyləqan, Lənkəran, Astara və Ağdamda yağış yağır. Yüksək dağlıq ərazilər olan Xınalıq, Ordubad və Şahdağa isə qar düşür.
Daşkəsən, Sarıbaş (Qax), Qobustan, Quba, Qusar, Xızı, Qrız və Lerikdə duman müşahidə olunur, görünüş məsafəsi 500 metrədək məhdudlaşır.
