Azərbaycanda devalvasiya olacağı, 1 dolların ən azı 2 manata qalxacağına dair xəbərlər son günlər yenidən intensiv şəkildə yayılmağa başlayıb. Görəsən həqiqətənmi dollar qalxacaq və dollar devalvasiyaya uğrayacaq? Ekspertlər bununla bağlı hansı proqnozları verir?

"Operativ Məlumat Mərkəzi-OMM" xəbər verir ki, iqtisadçı-analitik, Əmək və Əhalinin Sosial Müdafiəsi Nazirliyi yanında İctimai şuranın sədri, professor Elşad Məmmədov məsələ ilə bağlı bildirib ki, valyuta bazarındakı sabitliyə əsas təsir göstərən fundamental amillərdən biri xarici ticarətdəki vəziyyətdir. Azərbaycanda ixrac ənənəvi şəkildədir, uzun müddət ərzində idxalı üstələdiyini görürük.

İqtisadçı-ekspert son aylarda bu müsbət yöndə azalmalar müşahidə edildiyini, ancaq hələ də ixracın idxalı üstələdiyini qeyd edib. Ona görə də ekspert hesab edir ki, bu amil valyutamızın sabit saxlanması üçün müvafiq müsbət təsirlər göstərir. Mərkəzi Bank ən az yaxınmüddətli perespektivdə valyutamızın sabitliyini qorumaq üçün bütün imkanlara malikdir.

“Digər tərəfdən kapital qaçışı ilə effektiv mübarizə aparılmalıdır. Bu istiqamətlər üzrə Mərkəzi Bank bir sıra müsbət addımlar atmışdır. Ardıcıl şəkildə daha zəngin mexanizmlərlə ölkədən kapital çıxışının effektiv şəkildə qarşısının alınması ilə bağlı tədbirlər görülməlidir. Çünki bu kapital çıxışı ilə bağlı olan vəziyyət ümumiyyətlə son illərdə bir trend halını almışdır”, - deyə espert vurğulayıb.

O, bildirib ki, bu istiqamətdə proseslərlə effektiv şəkildə mübarizə aparılmalıdır ki, kapital qaçışının qarşısı alınsın. Əks halda, nə qədər xarici ticarətdə müsbət saldo olsa belə problemlər qaçılmaz olur.

Valyuta bazarındakı dayanıqlılıq nədən asılıdır?

Sualla bağlı iqtisadçı-ekspert hesab edir ki, maksimum şəkildə yerli istehsal stimullaşdırılmalıdır, idxalın əvəz olunması həyata keçirilməlidir. Çünki son nəticədə valyuta bazarındakı dayanıqlılıq, yerli istehsalın inkişafından asılıdır.  Əgər yerli istehsal lazımi şəkildə inkişaf etdirilərsə, o zaman valyutanın da sabitliyinə çox müsbət təsirlər göstərə bilərik. Bu baxımdan mənə elə gəlir ki, Mərkəzi Bank pul-kredit siyasətini yumşaltmalı, investisiyaların artımına xidmət edən siyasəti həyata keçirməlidir ki, biz yerli istehsalın stimullaşdırılması vasitəsilə idxalın həcminin artması ilə lazımi şəkildə mübarizə apara bilək.

Çünki son nəticədə investisiyalar azalırsa, idxaldan asılılıq artır və təbii olaraq Mərkəzi Bank milli valyutanın devalvasiyası riski ilə üz-üzə qala bilər. Son nəticədə idxal çox artar, ixrac azalarsa o zaman devalvasiya riskləri də arta bilər.

“Ona görə də mənə elə gəlir ki, yerli istehsalın stimullaşdırılması, investisiyaların artımı pul-kredit siyasətini yumşaldılması zəruridir ki, biz o cümlədən devalvasiya riskləri ilə effektiv mübarizə apara bilək”, - deyə ekspert sonlandırıb.

Xatırladaq ki, Prezident İlham Əliyev 2023-cü ilin 6 ayının sosial-iqtisadi yekunlarına həsr olunmuş müşavirədə deyib ki, ölkəmizdə makroiqtisadi sabitlik uzun illər ərzində təmin edilir. Manatın məzənnəsi altı ildir ki, sabitdir və bu da dünya praktikasında, xüsusilə indiki şəraitdə nadir hadisələrdən biridir.

Dövlət başçısı deyib ki, bu düşünülmüş siyasətin təzahürüdür və bu siyasətin mərkəzində təbii ki, Azərbaycan vətəndaşı dayanır. “Çünki makroiqtisadi sabitlik təbii ki, ölkə iqtisadiyyatına təsir edir. Amma, ilk növbədə, bunun ən ciddi təsiri insanların yaşayış səviyyəsinədir. Bizdə isə həm minimum əməkhaqları, həm minimum pensiyalar müntəzəm olaraq artırılır. Bununla paralel olaraq manat sabitdir”, - deyə Prezident İlham Əliyev qeyd edib.

Qeyd edək ki, 2006-cı il yanvarın 1-də 1:5000 miqyasında həyata keçirilən denominasiyadan sonra ilk devalvasiyaya qədər dolların məzənnəsi 2006-cı il yanvarın 3-də (0,9184 AZN/USD) ucuzlaşmağa başlayaraq, 2014-cü il iyunun 10-da minimal həddə (0,7842 AZN/USD) enib.

Aminə Nəzərova

Təhsil müəssisələrinin açılmasına sayılı günlər qalıb. Şəhər və bölgələrlə yanaşı, Azərbaycanın işğaldan azad edilmiş ərazilərində təhsil infrastrukturu və təhsil müəssisələrinin yenidən fəaliyyətə başlaması diqqət mərkəzindədir. Bu il Xankəndi şəhərində Qarabağ Universiteti, paytaxtda isə Türkiyə-Azərbaycan Universiteti tədris həyatına başlayır.

Bəs bu iki universitet Azərbaycanın təhsil sahəsində inkişafına necə təsir göstərəcək?

Mövzu ilə bağlı "Operativ Məlumat Mərkəzi-OMM"-ə danışan millət vəkili Tural Gəncəliyev bildirib ki, universitetin Xankəndidə açılması ilə minlərlə tələbə artıq bu universitetə qəbul olunub.

“Qarabağ Universiteti mənim üçün çox əziz, şəxsi mənada önəmli universitetdir. Çünki, mənim atam 1975-1980-ci illər ərzində Xankəndidə olan universitetin tarix fakültəsini bitirib. İndi bu universitetin yenidən fəaliyyətə başlaması, tariximizin, təhsil ənənələrimizin yenidən bərpa edilməsi məni çox sevindirir.

Bu təhsil müəssisəsinin fəaliyyətini bərpa etməsi və yenidən fəaliyyətə başlaması, Xankəndi şəhərinin canlanmasına, həyatının yenidən dirçəlməsinə xidmət edəcək. Çünki, tələbələr, gənclər aparıcı qüvvədir və onların hesabına Xankəndi şəhəri o gözəl enerjisini geri qaytaracaq”.

Deputat qeyd edib ki, Türkiyə-Azərbaycan Universiteti həm güclü təhsil müəssisəsi kimi, həm də strateji, geosiyasi alınan bir qərarla fəaliyyətə başlayacaq. Bu universitet Türkiyə-Azərbaycan əlaqələrinin nə qədər dərin, qardaşlıq münasibətlərimizin nə qədər səmimi olduğunu göstərir. Çünki, dünyada bu kimi universitetlər adətən iki ölkə arasında münasibətlərin göstəricisi kimidir.

Türkiyə universitetlərinin dünyanın ən tanınmış, yüksək səviyyəli standartlara cavab verən universitetlər olduğunu deyən T.Gəncəliyev bildirib ki, Türkiyə-Azərbaycan birgə Universitetinin yaradılması da bizim təhsil sistemimizin yeni standartlara keçidi deməkdir.

Deputat hesab edir ki, Qarabağ Universitetinin Xankəndidə fəaliyyətə başlaması onu göstərir ki, bizim Qarabağımız elm mərkəzinə, elm vadisinə çevriləcək. İşğaldan azad edilmiş ərazilərimizin ən gözəl bərpası, məhz həmin o ərazilərin intellektual potensialının bərpa edilməsi deməkdir ki, bu da həmin ərazilərdə güclü elm potensialının, güclü insan kapitalının və resursun olmasıdır.

“Türkiyə-Azərbaycan Universiteti regionda baş verən dəyişikliklərin bir aynasıdır. Türkiyə-Azərbaycan Universiteti hesab edirəm ki, gələcəkdə Türk Dövlətləri Təşkilatı və dərinləşməkdə olan Türk Dünyasının inteqrasiyası nəticəsində bütün Türk Dünyasının universitetinə çevriləcəkdir. Məncə Türk Dünyasının artan ürəyi təhsildə də Azərbaycanda olacaqdır. Necə ki, geosiyasi və geoiqtisadi ürəyi də Azərbaycanda atır”, - deyə millət vəkili qeyd edib.

Digər müsahibimiz millət vəkili Ceyhun Məmmədov bu il Azərbaycan təhsilində bir çox önəmli dəyişikliklərin olduğunu bildirib.

“Qarabağ Universitetinin yaradılmasının xüsusi əhəmiyyəti, aspekti var. Uzun illər Xankəndi işğal altında idi, ermənilər universitetin adını da dəyişmişdilər. Qarabağ Universiteti Azərbaycan həqiqətlərinin dünyaya çatdırılması, erməni vəhşiliklərinin ifşası baxımından da xüsusi önəm daşıyır. Biz artıq Qarabağın bu istiqamətdə fəaliyyətini görmüşük. Qarabağ Universiteti bizim üçün milli məsələ olmaqla yanaşı, Qarabağın Azərbaycana məxsusluğunu daha da gücləndirən amildir”.

Qarabağ Universiteti Azərbaycan təhsilinin inkişafına təkan verəcək. Qarabağ Universitetinə ən yüksək bal toplayan gənclər meyil göstərdilər. Yeni yaranmış universitet üçün belə bir göstərici, belə bir rəqəm hesab edirəm ki, kifayət qədər yüksəkdir”, - deyə deputat qeyd edib.

C.Məmmədov hesab edir ki, Bakıdan universitetləri köçürməkdənsə, bölgələrdə yeni universitetlər yaradaraq bu prosesə töhfə verə bilərik. Eyni zamanda, Qarabağ və Şərqi Zəngəzurda daha bir universitetin yaradılması məsələsinə baxıla bilər.

“Türkiyə-Azərbaycan Universitetin yaradılması da çox önəmlidir. Bu gün biz Türkiyə-Azərbaycan əlaqələrinin sürətlə inkişaf etdiyini, münasibətlərimizin yeni bir mərhələyə daxil olduğunu müşahidə edirik. Bu mənada bu universitetin yaradılması, Türkiyə universitetlərinin əldə etdiyi uğurlarının, təcrübəsinin Azərbaycanda tətbiqi, həmçinin iki ölkə arasında əlaqələrin möhkəmləndirilməsi baxımından da çox önəmlidir”, - deyə millət vəkili sonlandırıb.

Aminə Nəzərova

Azərbaycan Respublikasının Baş naziri Əli Əsədov yeni qərar imzalayıb. Qəbul edilmiş yeni qərara əsasən Ali məktəblərdə illik təhsil xərclərinin yeni miqdarı müəyyənləşib. Bir çox ixtisasların isə illik ödəniş qiymətlərinin artdığını görürük. 

Bəs bu qərarı zəruri edən amil nədir? Bu yeni qərar Azərbaycan təhsilinə necə təsir edəcək?

Mövzu ilə bağlı “Operativ Məlumat Mərkəzi – OMM”-ə açıqlama verən təhsil eksperti İlqar Orucov deyir ki, Baş nazir Əli Əsədov tərəfindən Ali təhsil müəssisələrinin illik xərclərinin yeni miqdarı müəyyənləşib. 

"Mən hər zaman ali təhsil müəssisələrində təhsil haqqlarının aşağı olmasının tərəfdarı olmuşam. Ümumiyyətlə dünyanın bütün ölkələrində yaxşı təhsil hər zaman baha olub. Biz ümumi nəzər salsaq görərik ki, həmin ölkələrdəki təhsilin səviyyəsi də yüksəkdir və həmin təhsil müəssisələri dünya reytinqində çox qabaqcıl yerlərdədilər. Əlavə olaraq, həmin ölkələrdəki təhsil müəssisələrində təhsil haqqı kifayət qədər də bahadır. Bu vəsaitlər isə təkcə tələbəyə dərs deyən müəllimlərə sərf olunmur, ümumillikdə ali təhsildə infrastrukturun, məzmunun yenilənməsi, dərsliklər, kitabxana sistemi, həmçinin ali təhsil müəssisələrində çalışan akademik heyətin pəşəkarlığının artırılması, onların elmi ezamiyyətlərə göndərilməsi üçün xərclənir".

Ekspertin fikrincə, təhsil müəssisələrində xərclərin təsnifatı kifayət qədər böyükdür. 

"Təhsil müəssisəsinin saxlanılması, xərcləri, yeni infrastrukturun qurulması böyük vəsait tələb edir. Bizim universitetlərin əsas gəlir mənbəyi tələbələrin ödənişləri əsasında formalaşır. Bu baxımdan da həmin normalar müəyyənləşdirilərkən bazar qiymətləri, ölkədə inflyasiya nəzərə alınır. Bütün bunlar isə tələbələrin təhsil haqlarına birbaşa təsir göstərir. Ali təhsil müəssisələrinin pedoqoji heyətinin zaman-zaman tərəfində olmuşuq ki onların peşəkarlığı, sosial durumu yaxşı olsun. Bunlar isə kifayət qədər maliyyə tutumlu məsələlərdir. Yeni normalar universitetlərin inkişafı üçün əlavə imkanlar yaradacaq".

Mədinə Useynova 

Ötən gün Ermənistan XİN rəhbəri Ararat Mirzoyan dedi ki, İrəvan və Bakı sülh müqaviləsinin 16 maddəsinin 13-ü üzrə tam razılığa gəliblər. Sülh sazişinin tezliklə imzalanması üçün real şans var. Daha sonra Rəsmi Bakı İrəvana cavab verdi. Qeyd edildi ki, Ermənistan tərəfi, Azərbaycanın təqdim etdiyi şərhlərə adekvat reaksiya vermək əvəzinə layihədə əks olunması zəruri olan müddəaları çıxarmaqla problemlərə göz yummağa cəhd göstərib.

Bəs Ermənistanın bu addımları sülh müqaviləsinə necə təsir edir? Ən əsas məsələ, sülh müqaviləsinin imzalanmasına qarşı olan güclər hansılardır?

Mövzu ilə bağlı "Operativ Məlumat Mərkəzi-OMM"-ə danışan millət vəkili Fazil Mustafa dedi ki, Ermənistanın Azərbaycan ilə sülh müqaviləsini bağlamasına maneə olanlardan biri İrandır. Mahiyyətcə İranın dövlət ideologiyası kin və düşmənçilikdir. Ona görə də sülh adı gələndə, İranın “başı ağrıyır”, əsəbiləşir. Sülh sözünü qəbul eləmir.

“Ermənistan İran ilə əlaqələrin kəsilməsindən qorxaraq sülh müqaviləsinin imzalanması prosesini uzadır. Ermənistan bilsin ki, bu dövlətə qüvənərək özünü təhlükəyə atır. Rəsmi İrəvan bu məsələdə Azərbaycana qüvənməlidir və qətiyyətli addım atmalıdır. Bölgəyə başqa dövlətlər, başqa niyyətlər ilə müdaxilə etməməlidir”.

Deputat vurğuladı ki, sülh müqaviləsi elə bir addımdır ki, burada mütləq tərəflər arasında müəyyən iddiaların irəli sürülməsi düşünülə bilər.

“Ermənistan məğlub tərəfdir. Məğlub tərəf üçün də müəyyən ziddiyət təşkil edən addımlar narahatlıq yarada bilər. Ermənistan daxili vəziyyəti yumşaldaraq sülh müqaviləsi imzalamaq istəyir. Azərbaycan isə öz strategiyasını müəyyən edib. Ölkəmiz qalıcı sülhün olmasını istəyir. Bizim məsələyə yanaşma üslubumuz ilə Ermənistanın məsələyə yanaşma üslubu fərqlənir. Niyyətlər isə sülh müqaviləsinin bağlanmasına yönəlib.

Elə məsələlər var ki, bu, Azərbaycanın marağına zidd olsa ölkəmiz buna razılıq verməyəcək. Ermənistan isə buna məhkumdur. Çünki bundan sonra sülhün alternativi - yeni hərbi münaqişədir. Bu da Ermənistan üçün problem yaradacaq bir məsələdir. Belə bir vəziyyətdə Ermənistan sülhün bağlanmasına razılıq verməlidir”, - deyə deputat sonlandırdı.

Digər müsahibimiz millət vəkili Naqif Həmzəyev bildirdi ki, Ermənistan sülhdən yayınır və təxribatlar törədir. 2024-cü ildə Ermənistan reallıqları dərk etməyə başladı və sülhə yaxınlaşmaq üçün müəyyən addımlar atdı.

“İlkin mərhələdə 13 km məsafənin delimitasiya və demarkasiya olunmasını müşahidə etdik. Lakin bu proses çox ləng gedir. Xüsusilə də Ermənistanın havadarları, Ermənistana silah tədarük edən güclər sülhün olmasını istəmirlər. Sonuncu baş verən hadisələr isə onu deməyə əsas verir ki, Ermənistan yenə də öz ampluasındadır. Onlar öhdəliklərini yerinə yetirməkdən boyun qaçırmaq istəyirlər. İstənilən halda Azərbaycan öz mövqeyində qətidir. Ermənistanın vaxt uzatması özünə ziyan verəcək”.

Deputat dedi ki, gec-tez sülh müqaviləsi imzalanacaq. Çünki Azərbaycan birbaşa komminukasiyaların istifadəyə verilməsi ilə bağlı olan müddəanın sülh mətnindən çıxarmağa razılıq vermək ilə bir növ prosesi yüngülləşdirmək istədi.

“Təəssüf ki, Ermənistan bununla kifayətlənmədi. Onlar daha az müddəa ilə sülh müqaviləsi imzalamaq istəyirlər. Lakin bu baş tutmayacaq. Ancaq sülh müqaviləsi imzalansa da Ermənistandan həmişə ehtiyatlı davranmaq lazımdır. Çünki onlar müstəqil siyasət yürütmürlər. Azərbaycan sülhə məcbur etmək siyasətini davam etdirərək sülhə nail olacaq. Sülh müqaviləsi imzalandan sonra isə Zəngəzur dəhlizinin işə düşməsi reallaşacaq”.

Mehman Mirzəzadə

Ötən günlərdə Ermənistan respublikasının xarici işlər nazirinin müavini Mnatsakan Safaryan Naxçıvana gedən avtomobil yolundan danışıb. O qeyd edib ki, Azərbaycanla gələcək nəqliyyat kommunikasiyalarının təhlükəsizliyinin təmin edilməsi funksiyalarının özəl şirkətlərə verilməsi imkanı nəzərdən keçirilir. Vergi və gömrük funksiyalarını Ermənistanın müvafiq xidmətləri həyata keçirəcək.

Azərbaycan Naxçıvana gedən yola nəzarətin özəl şirkətə verilməsi ilə razılaşa bilərmi? Özəl şirkət dedikdə nə nəzərdə tutulur? Özəl şirkət Ermənistanı, Azərbaycanı, Rusiyanı və ya ayrı bir tərəfi təmsil edəcəkmi? Və ya bu təmsilçilik hansı güc mərkəzi tərəfindən icra olunacaq?

Mövzu ilə bağlı "Operativ Məlumat Mərkəzi-OMM"-ə açıqlama verən millət vəkili Bəhruz Məhərrəmov bildirir ki, 10 noyabr 2020-ci il kapitulyasiya aktının 9-cu maddəsinə əsasən Ermənistan vətəndaşların, nəqliyyat vasitələrinin və yüklərin iki istiqamətdə maneəsiz hərəkətinin təşkili məqsədilə Azərbaycanın qərb rayonları ilə Naxçıvan arasında nəqliyyat əlaqəsinin təhlükəsizliyinə zəmanət verməyi öhdəsinə götürüb.

“Həmçinin Azərbaycan Respublikasının Prezidenti, Ermənistan Respublikasının Baş naziri və Rusiya Federasiyasının Prezidentinin birgə imzaladığı bu bəyanatda Ermənistan öz üzərinə götürüb ki, qeyd olunan nəqliyyat əlaqəsi üzrə nəzarəti Rusiya Federal Təhlükəsizlik Xidmətinin sərhəd xidmətinin orqanları həyata keçirəcək. Bu gün Ermənistanın həmin sənədlə üzərinə götürdüyü öhdəliklərə əməl etməməsi ilk növbədə beynəlxalq hüququn ümumtanınmış prinsiplərindən olan "pacta sunt servanda", yəni öhdəliklərə vicdanla əməl edilməsi prinsipinə ziddir və beynəlxalq hüququn aliliyinə dırnaqarası yanaşmadır. Ermənistan Respublikası anlamalıdır ki, Azərbaycanın qərb rayonları Naxçıvan Muxtar Respublikasını birləşdirəcək xətt, yəni Zəngəzur dəhlizi xüsusi yanaşma tələb edir”. 

Millət vəkili deyir ki, Ermənistan Respublikası onu anlamalıdır ki, Azərbaycanın qərb rayonları ilə Naxçıvan arasında əlaqə, Azərbaycan vətəndaşlarının Azərbaycanın bir bölgəsindən digərinə keçidi bu ölkənin iradəsindən asılı ola bilməz və Azərbaycan vətəndaşları Naxçıvana gedərkən, yaxud Naxçıvandan Azərbaycanın qərb rayonlarına hərəkət edən soydaşlarımız buna görə Ermənistana hər hansı formada rüsum ödəməli deyil. Digər tərəfdən, Ermənistanın dövlət siyasətinin təməlində terrorçuluğun dayandığını bilərəkdən daha radikal davranan cəmiyyətə, o cümlədən özəl şirkətlərə Zəngəzur dəhlizi üzrə hərəkət edəcək azərbaycanlıların təhlükəsizliyini əmanət etmək mümkün deyil. Ələxsus nə qədər ki, erməni cəmiyyətində antitürk, anti-Azərbaycan əhval-ruhiyyə hökm sürür, nə qədər ki, Ermənistanın siyasilərindən sıravi vətəndaşlarına qədər hələ də revanşist iddialarla yaşayan insanlar mövcuddur, İrəvanın Zəngəzur dəhlizi ilə bağlı təklif etdiyi, yaxud dilə gətirdiyi konfiqurasiya özünü doğrulda bilməz.

“İranın məsələdə tutduğu mövqeyə gəlincə, Azərbaycan və Ermənistan arasında razılaşma əldə olunarsa, bu, iki dövlətin suveren iradəsinin ifadəsi olacaq və Tehran da daxil heç bir üçüncü ölkə bu münasibətlərə müdaxilə edə bilməz. İran və Ermənistan arasında Zəngəzur dəhlizi ilə bağlı cari fikir uzlaşmasına gəlincə, görünən odur ki, Ermənistan hələ də Zəngəzur dəhlizinin realizəsi ilə bəyanatlarında səmimi deyil və özünün iqtisadi potensialının, suveren imkanlarının genişlənməsi fürsətini revanşist ideyalara və Qərbin imperialist dairələrinin heç bir siyasi, hüquqi və faktiki əsasa söykənməyən təşviqinə qurban verir” – deyə, B.Məhərrəmov sonda bildirdi.

Digər müsahibimiz hərbi-siyasi ekspert Azad İsazadə isə deyir ki, burada söhbət təkcə Azərbaycan-Naxçıvan yolundan getməməlidir. Çünki Azərbaycan həmişə məsələni daha geniş qoyur. Burada əsas məsələlərdən biri təkcə avtomobil yolunun yox, eyni zamanda dəmiryolu və Qazax-İncivan kommunikasiyasının da açılmasıdır. Ermənistanın irəli sürdüyü təklifi isə qeyri-realdır. Azərbaycan bu təklifdən imtina edəcək. Ümumiyyətlə Azərbaycan yolların açılması təklifindən imtina etməyəcək, sadəcə Azərbaycan Ermənistanın irəli sürdüyü məntiqsiz bir təklifə “yox” deyəcək.

“Bəs Ermənistanın dediyi “özəl şirkət” anlayışı nədir? Bu özəl şirkəti hansı dövlət təşkil edəcək? Harada qeydiyyata düşəcək? Bu şirkəti kim maliyyələşdirəcək? Burada söhbət yola nəzarət edəcək hansısa kampaniyadan getmir, söhbət sərhəd nəzarətindən və gömrük nəzarətindən gedir. Azərbaycan məsələni birbaşa qoyur ki, Azərbaycandan Naxçıvana gedən mallara heç bir nəzarət olmamalıdır, Naxçıvandan tranzitlə digər ölkələrə gedən mallara isə Ermənistan istənilən formada nəzarət edə bilər. Ona görə də, kommunikasiyanın açılması məsələsinin müzakirəsi üçüncü dövlətlərin iştirakı olmadan aparılmalıdır”.

Müsahibimiz bildirir ki, Ermənistan ümumiyyətlə hansısa kommunikasiyaları açmaq fikrində deyil. Səbəb isə odur ki, Qərb, ABŞ, Azərbaycan və Rusiya fərqli mövqelərdən çıxış edir. Ermənistan da kənara çəkilib gözləyir ki, bu dövlətlər nə vaxt razılığa gəlsə, o zaman nəsə edəcək. Yaxın vaxtlarda bu məsələ ilə bağlı razılığa gəlinməsi qeyri-mümkündür. Ermənistan özəl şirkət, sərhəddə görüşmə və ya digər təklifləri irəli sürüb nümayiş etdirəcək ki, guya o, nə isə etmək istəyir. Bu təkliflərin arxasında heç bir real siyasi, iqtisadi reallıq yoxdur.

Mədinə Useynova

Keçən ilin sentyabr ayında keçirilən antiterror əməliyyatını öz keçirilmə vaxtı, eyni zamanda keçirilmə taktikası ilə hər antiterror əməliyyatı ilə müqayisə etmək olmaz. Əsas məsələ odur ki, biz hansısa bir terrorçuya qarşı deyil, bir terror yuvasına, özünü dövlət elan etmiş terroristlərə, separatçılara qarşı keçirmişik. Yaxşı silahlanmış, müasir silahları və müxtəlif dövlətlərdə terror təşkilatlarının düşərgələrində təlim keçmiş bir orduya qarşı antiterror əməliyyatı keçirdik.

Bu sözləri "Operativ Məlumat Mərkəzi-OMM"-ə açıqlamasında Milli Məclisinin VI çağırış deputatı Arzu Nağıyev bildirib.

“Əsas məsələ odur ki, biz etik antiterror əməliyyatı həyata keçirdik. Burada Azərbaycan ordusu, xüsusi xidmət orqanları, bütün iştirakçı hərbçilərin hər biri müharibə qanunlarına uyğun olaraq, etik normaları qorudular. Heç bir şəxsə qarşı (terror təşkilatının üzvü deyilsə) hər hansısa bir təcavüz və yaxud öldürmək məsələsi olmadı. Sadəcə olaraq məqsəd terrorçuların silahlarının əlindən alınması, onları məhv etmək, eyni zamanda ərazimizdən qovmaq idi. Bununla da Azərbaycan tam şəkildə özünün ərazi bütövlüyünü bərpa etdi”.

Millət vəkili vurğulayıb ki, paralel olaraq, kim ərazini tərk etmək istəyirsə, onlara müvafiq dəhlizlər yaradıldı və onlar ərazini tərk etdilər. Lakin yerdə qalan terrorçulara qarşı ən ciddi addımlar atıldı. Baxmayaraq ki, bir ilə yaxın müddət keçib, indi də onların silah-sursatlarının yığılması davam edir və çıxan silahların da, texnikanın da nədən ibarət olduğunu bütün dünya görür.

“Azərbaycan ordusunun antiterror əməliyyatını keçirməsini zəruri edən amil ondan ibarət idi ki, separatçı dəstələrin Azərbaycan daxilində yeni bir dövlətin yaradılması üçün zəmin yaradırdılar. Bunun da qarşısı mütləq şəkildə alınmalı idi. Bildiyimiz kimi, onların bütün rəhbər heyəti həbs edilib və öz cəzalarının nə ilə nəticəndiyini öz gözləri ilə görməkdədirlər.

Bizim heç kimin ərazi bütövlüyündə gözümüz yoxdur. Sadəcə olaraq, öz suverenliyimizi və ərazi bütövlüyümüzü bərpa edirdik və buna görə də biz bu əməliyyatı keçirdik”.

Deputat vurğulayıb ki, bu gün antiterror əməliyyatından sonra regionda demək olar ki, vəziyyət stabildir. Buna baxmayaraq, Qərb ciddi cəhdlə çalışır ki, Ermənistan ərazisinə silah daşısın və buna müəyyən qədər nail olurlar. Eyni zamanda, sərhəddə vizual kəşfiyyatçılar yerləşdirməklə Azərbaycana qarşı məlumatların toplanması və öz rəhbərlərinə ötürülməsi istiqamətində addımlar atırlar. Buna baxmayaraq Azərbaycan tam şəkildə öz ərazisini, suverenliyini bərpa edib. Artıq delimitasiya və demarkasiya məsələsi başlayıb. Düşünürəm ki, bu davam edəcəkdir.

“Bu gün baxmayaraq ki, Qərb müharibəni yenidən alovlandırmağa çalışır, Azərbaycan bütün atılacaq addımlara qarşı adekvat cavab verməyə qadirdir. Buna bizim ordumuzun, xüsusi xidmət orqanlarımızın gücü var. Azərbaycan xalqı başa düşür ki, bu suverenliyini, ərazi bütövlüyünü bir daha onlardan almaq mümkün olmayacaq. Ona görə də, bu antiterror əməliyyatının müsbət cəhdi ondan ibarətdir ki, biz heç bir dövlətin ərazi bütövlüyünə təcavüz etmədik, eyni zamanda beynəlxalq qanunlara qarşı hər hansısa zidd hərəkət etmədik və beynəlxalq qanunlara uyğun olaraq öz ərazi bütövlüyümüzü bərpa etdik”, - deyə millət vəkili sonlandırıb.

Aminə Nəzərova