Berlində Azərbaycan Kino Günləri baş tutub. Mədəniyyət Nazirliyinin tabeliyindəki Kino Agentliyi, Azərbaycanın Almaniyadakı Səfirliyi və Berlindəki Azərbaycan Mədəniyyət Mərkəzinin birgə təşkilatçılığı ilə keçirilən tədbir, milli kinomuzu Avropa auditoriyasına təqdim edib.
Nazirlikdən "Operativ Məlumat Mərkəzi-OMM"-ə verilən məlumata görə, bu mədəni hadisə çərçivəsində əsas diqqət mərkəzində "Zəfər rəqsi" filmi olub.
Azərbaycan Mədəniyyət Mərkəzinin direktor vəzifəsini müvəqqəti icra edən İsa Məmmədov tədbirin missiyasını açıqlayıb. O, Azərbaycan kinosunun beynəlxalq məkanda tanıdılmasının və mədəniyyətlərarası dialoqun inkişaf etdirilməsinin əhəmiyyətini vurğulayıb.
Xalq artisti Mehriban Zəki çıxışında yerli kinematoqrafiyanın son illərdə qazandığı uğurlara toxunub. O, müasir kino nümunələrinin xarici tamaşaçılarla birbaşa təmasının vacibliyindən danışıb.
Filmin ideya müəllifi, "Ədibin evi" Ədəbiyyata Dəstək Fondunun icraçı direktoru Şəfəq Mehrəliyeva isə ekran əsərinin beynəlxalq nümayişinin məhz Berlin şəhərindən başlamasının rəmzi mənasını qeyd edib.
Tədbirin rəsmi hissəsi və kino nümayişindən sonra iştirakçılar üçün xüsusi şəbəkələşmə görüşü təşkil olunub.
