OMM Redaksiyası
Azərbaycan Bakıda keçirilən 2026-cı il cüdo üzrə dünya çempionatında rekord nəticəyə imza atıb. Yarışda 5 medal qazanan milli komanda medal cədvəlində Yaponiyadan sonra ikinci yerdə qərarlaşıb.
Azərbaycanın beşinci medalını Murad Fətiyev əldə edib. O, kişilərin 90 kq çəki dərəcəsində Serbiya təmsilçisi Nemanya Maydova qalib gələrək bürünc medal qazanıb.
Görüş “Qızıl xal” mərhələsinə uzanıb və Fətiyev burada yuko xalı ilə qalib gəlib. Bu, onun dünya çempionatlarında ilk medalıdır.
Yaponiya təmsilçisi Sanshiro Murao kişilərin 90 kq çəki dərəcəsinin finalında həmyerlisi Goki Tacimanı ipponla məğlub edərək qızıl medal qazanıb. Bununla Muraonun məğlubiyyətsiz seriyası 27 görüşə çatıb.
Gürcüstanlı Tato Qriqalaşvili kişilərin 81 kq çəki dərəcəsinin finalında Azərbaycanın Zelim Tsakayevini məğlub edərək ölkəsinə çempionatın ilk qızıl medalını qazandırıb. Gərgin keçən görüş “Qızıl xal” mərhələsinə uzanıb və Qriqalaşvili əlavə vaxtın dördüncü dəqiqəsində qalib gəlib. Tsakayev gümüş medalla kifayətlənib.
Oktyabrın 4-dən 10-dək davam edən dünya çempionatında 90-dan çox ölkədən 620-dən artıq idmançı iştirak edir. Bakıda fərdi yarışların son günündə ağır çəki dərəcələrində qalan qızıl medallar uğrunda mübarizə keçiriləcək.
