Avstraliya hökuməti 16 yaşdan aşağı uşaqların sosial media platformalarına girişini məhdudlaşdıran qanunvericiliyi daha da sərtləşdirmək üçün yeni qanun layihəsi hazırlayıb.
“Operativ Məlumat Mərkəzi-OMM” xəbər verir ki, bu barədə Avstraliyanın Baş naziri Entoni Albaneze açıqlama verib.
Bildirilib ki, mövcud qaydalara baxmayaraq, bir çox uşaq hələ də sosial media platformalarından istifadə edir və texnologiya şirkətləri qanunun tələblərinə tam əməl etmirlər.
Məlumata görə, yeni qanun layihəsi ölkənin internet tənzimləyicisinə texnologiya şirkətlərinə qarşı daha geniş hüquqi səlahiyyətlər verəcək. Qeyd olunub ki, qanuna əsasən, qaydaları pozan platformalara tətbiq edilən cərimələrin yuxarı həddi 49,5 milyon Avstraliya dollarından 99 milyon Avstraliya dollarına qaldırılacaq.
Bununla yanaşı, rabitə naziri Anika Uells bildirib ki, Elektron Təhlükəsizlik Komissarı (eSafety Commissioner) artıq şirkətlərin daxili sənədlərini, o cümlədən idarə heyətinin iclas protokollarını və daxili yazışmalarını tələb etmək hüququ əldə edəcək. Bu addımın qanunvericiliyə əməl etməyən platformalara qarşı hüquqi tədbirlərin daha effektiv həyata keçirilməsinə xidmət edəcəyi vurğulanıb.
Hazırda tənzimləyici orqan “Meta” şirkətinə məxsus “Facebook” və “Instagram”, eləcə də “Snapchat”, “TikTok” və “Google” şirkətinə məxsus “YouTube” platformalarının fəaliyyətini və qanunvericiliyə uyğunluğunu araşdırır.
Qeyd edək ki, adıçəkilən şirkətlərin əksəriyyəti məsələ ilə bağlı hələlik rəsmi mövqe açıqlamayıb.
