OMM Redaksiyası
“Aston Villa” zədələrlə üz-üzə qalıb.
"Operativ Məlumat Mərkəzi-OMM" xəbər verir ki, komandanın aparıcı yarımmüdafiəçilərindən olan Yuri Tilemans topuq nahiyəsindən aldığı zədə səbəbindən iki aydan çox yaşıl meydanlardan kənarda qalacaq.
Belçikalı futbolçu ötən bazar günü Premyer Liqada “Nyukasl”a qarşı 2:0 hesablı qələbə ilə başa çatan görüşdə zədələnib. Tibbi müayinələrdən sonra Tilemansın bərpa prosesinin 8–10 həftə çəkəcəyi müəyyənləşib. Bu isə onun aprel ayında komandaya qayıda biləcəyi anlamına gəlir.
“Villa”nın itkiləri bununla da bitmir. Komandanın kapitanı Con Makginn dizindən zədə alıb və onun da 6–8 həftə meydanlardan uzaq qalacağı bildirilir. Bundan əlavə, Boubakar Kamaranın mövsümün qalan hissəsini buraxacağı açıqlanıb.
Baş məşqçi Unai Emeri vəziyyətlə bağlı BBC-yə açıqlamasında bunları deyib:
“Tilemans səkkiz-on həftə, Makginn isə altı-səkkiz həftə sıradan çıxacaq. Kamara isə mövsümün sonuna qədər komandaya kömək edə bilməyəcək. Bu səbəbdən qarşıdakı oyunlarda mərkəz yarımmüdafiədə alternativ variantlar tapmalıyıq.”
Qeyd edək ki, “Aston Villa” bu boşluqları qismən “Yuventus”dan transfer olunan Duqlas Luiz hesabına doldurmağı planlaşdırır. Yeni transferin yaxın oyunlarda Emerinin əsas seçimlərindən biri olacağı gözlənilir.
