"Aston Villa" klubunun qapıçısı Emiliano Martinesin bu yay komandanı tərk edə biləcəyi ilə bağlı xəbərlər yayılıb. Argentinalı qolkiperin karyerasında yeni bir mərhələyə başlamaq istəyi barədə müxtəlif mənbələrdə dəfələrlə məlumat verilib.
"Operativ Məlumat Mərkəzi-OMM" "Sky Italia" nəşrinə istinadən xəbər verir ki, "Aston Villa" rəhbərliyi futbolçunun gedişinə mane olmamaq qərarına gəlib.
Klubun 33 yaşlı qapıçı ilə uzunmüddətli müqaviləsi olmasına baxmayaraq, onun üçün tələb olunan təzminat məbləği cəmi 5 milyon avro təşkil edir.
Transferin reallaşması üçün əsas çətinlik oyunçunun yüksək əməkhaqqı ilə bağlıdır. Martinesin illik gəliri təxminən 7 milyon avro civarındadır ki, bu da potensial alıcılar üçün ciddi maliyyə yükü yaradır.
Hazırda argentinalı qapıçı ilə maraqlanan klublar arasında İtaliyanın "Yuventus" komandasının adı hallanır.
Bununla belə, Turin təmsilçisinin əsas hədəfinin "Tottenhem"in qapıçısı Qulyelmo Vikario olduğu bildirilir.
29 yaşlı italiyalı qolkiperin transferi daha baha başa gəlsə də, onun maaş tələblərinin Martinesdən xeyli aşağı olması "Yuventus"u bu varianta daha çox meyilləndirir.
