Almaniyada 15 yaşlı yeniyetmə Milad bazarına hücum planlaşdırmaqda şübhəli bilinərək həbs edilib.
"Operativ Məlumat Mərkəzi-OMM" xəbər verir ki, bu barədə Almaniya hüquq-mühafizə orqanları məlumat yayıb.
15 yaşlı yeniyetmə Vittstok şəhərindən olan 16 yaşlı başqa bir nəfərlə birgə Düsseldorf şəhərindəki Milad bazarlarından birinə hücum etmək barədə razılığa gəliblər. Onlar hücum planlarını Teleqram üzərindən müzakirə ediblər.
Hücumun dekabrın 1-də təşkil edilməsi planlaşdırılıb.
Prokurorluq, hər iki şəxsin saxlanıldığını, hadisə ilə bağlı araşdırma aparıldığını bildirib. Yeniyetmələrin Əfqanıstan və Rusiya vətəndaşları olduqları məlum olub.
Almaniyanın daxili kəşfiyyat xidməti İsrail-HƏMAS qarşıdurmasının başlamasından sonra ölkədə hücum riskinin yüksəldiyini bildirib.
Həmçinin, son həftələrdə ölkədə islamofobiya və antisemitizm hallarının artdığı vurğulanıb.