AFFA İntizam Komitəsi, Misli Premyer Liqasının XIX turu çərçivəsində baş tutan oyunlarla bağlı qərarlarını elan edib və bir sıra klublara ciddi maliyyə sanksiyaları tətbiq olunub.
“Operativ Məlumat Mərkəzi-OMM” xəbər verir ki, bu barədə qərar qurumun son iclasında qəbul edilib.
Turun ən yüksək cəriməsi "Araz-Naxçıvan" klubuna kəsilib. 8 fevral tarixində keçirilən "Sabah" – "Araz-Naxçıvan" qarşılaşması qonaq komandanın meydançaya gec çıxması səbəbindən yubandığı üçün klub 3000 manat cərimələnib. Həmin oyunda "Araz-Naxçıvan"ın 4 futbolçusu sarı vərəqə aldığına görə kluba əlavə 700 manat, ev sahibi "Sabah"a isə Əsasnamə tələblərini pozduğuna görə 1000 manat cərimə yazılıb.
"Zirə" klubu 8 fevralda "Sumqayıt"la baş tutan matçda geyim qaydalarını pozub. Komandanın 5 və 25 nömrəli futbolçularının şortundakı nömrələr standartlara uyğun olmadığı üçün klub 1500 manat məbləğində cəriməyə məruz qalıb.
10 fevralda keçirilən "Şamaxı" – "Qarabağ" görüşündə Ağdam təmsilçisinin 4 oyunçusu sarı vərəqə ilə cəzalandırılıb, nəticədə klub 700 manat ödəyəcək. Bundan əlavə, azarkeşlərin sındırdığı 25 ədəd oturacağa görə stadiona dəymiş zərər "Qarabağ" tərəfindən qarşılanacaq.
"Neftçi" – "Qəbələ" matçının 90+1-ci dəqiqəsində meydandan qovulan Elvin Bədəlov 1 oyunluq cəza alıb. "Ağ-qaralar"ın müdafiəçisi ikinci sarı vərəqəni gördüyü üçün klubu da 500 manat cərimə edilib.
