"Azərbaycan Dəmir Yolları" QSC (ADY) qarşıdan gələn Novruz və Ramazan bayramları münasibətilə sərnişinlərin rahatlığını təmin etmək üçün ölkədaxili marşrutlar üzrə əlavə qatar reysləri təyin edir.
“Operativ Məlumat Mərkəzi-OMM” bu barədə səhmdar cəmiyyətinə istinadən xəbər verir.
Təsdiqlənmiş qrafikə əsasən, bayram günlərində aşağıdakı istiqamətlərdə xüsusi səfərlər təşkil olunacaq:
- 20-30 mart: Hər gün Bakı-Qəbələ-Bakı;
- 19-30 mart: Hər gün Bakı-Ağstafa-Bakı;
- 23 və 25 mart: Bakı-Ağdam-Bakı marşrutu.
Sərnişinlər Bakı-Ağstafa-Bakı qatarlarına biletləri 10% endirimlə əldə edə bilərlər. Satış dəmiryol kassalarında, ADY-nin rəsmi saytında və ya "ADY Mobile" tətbiqi üzərindən həyata keçirilir.
Bundan əlavə, bayram günlərində Bakı–Qazax–Bakı, Bakı-Balakən-Bakı və Gəncə-Qəbələ-Gəncə marşrutları üzrə hərəkət davam edəcək. Həmçinin, 21 və 28 mart tarixlərində Bakı-Ağdam-Bakı marşrutu ilə ənənəvi qrafik üzrə reyslər icra olunacaq.
