Afət Ziyadqızı
Pakistanın xarici işlər naziri İshaq Dar Bişkekdə keçirilən Şanxay Əməkdaşlıq Təşkilatının (ŞƏT) Dövlət Başçıları Zirvəsi çərçivəsində iranlı həmkarı Abbas Əraqçi ilə görüşüb.
“Operativ Məlumat Mərkəzi – OMM” xəbər verir ki, Pakistan Xarici İşlər Nazirliyinin “X” sosial şəbəkəsində yaydığı məlumata görə, görüşdə ikitərəfli münasibətlərin inkişafı və regionda baş verən cari proseslər ətrafında geniş fikir mübadiləsi aparılıb.
İshaq Dar regional sülh və sabitliyin təmin olunmasında diplomatiya və dialoq kanallarının əhəmiyyətini vurğulayıb.
Pakistanlı nazir xüsusilə ABŞ və İran arasında gərginliyin azaldılması istiqamətində atılan addımlara toxunaraq bildirib ki, tərəflər arasında əldə olunmuş “İslamabad Razılaşması”nın səmimi şəkildə icra edilməsi böhranın həlli üçün ən effektiv yoldur.
Xatırladaq ki, sözügedən razılaşma ABŞ və İsrailin İrana qarşı hərbi hücumları ilə başlayan münaqişənin həlli və regionda gərginliyin azaldılmasına yönəlib.
