ABŞ hökuməti geniş yayılmış süni intellektli robotlardan sui-istifadə hallarına qarşı sərt tədbirlər görəcəklərini açıqlayıb.
"Operativ Məlumat Mərkəzi-OMM" xarici mediaya istinadən xəbər verir ki, Federal Ticarət Komissiyasının sədri Lina Xan Ədliyyə Departamenti, Bərabər Məşğulluq İmkanları Komissiyası və İstehlakçının Maliyyə Müdafiəsi Bürosunun rəsmiləri ilə süni intellektin ədalətsiz, aldadıcı və ya sui-istifadə hallarına qarşı mübarizə səyləri ilə bağlı görüş keçirib.
Görüşdən sonra verilən birgə bəyanatda süni intellektli robotlardan sui-istifadə hallarına qarşı “hüquq, ədalət və bərabərlik prinsiplərini müdafiə etmək” öhdəliyi götürülüb.
Süni intellektin faydalı olduğu kimi qeyri-qanuni də istifadə oluna biləcəyi və ayrı-seçkiliyə səbəb ola biləcəyi də vurğulanıb.
ABŞ qanunlarına uyğun olaraq süni intellektli robotların istifadəsi istiqamətində mühüm addımların atılacağı bildirilərkən, FTC sədri Xan, "Amerikalıları süni zəka saxtakarlığı və ayrı-seçkilik kimi təhdidlərdən qorumaq üçün bütün səlahiyyətlərimizdən istifadə etməkdən çəkinməyəcəyik" dedi.
Süni intellekt texnologiyalarını inkişaf etdirən şirkətlər arasında artan rəqabət yeni şübhələr yaradır.
