Amerika Birləşmiş Ştatları administrasiyası hesab edir ki, Rusiya prezidenti Vladimir Putinin Şimali Koreya lideri Kim Çen Ina hədiyyə etdiyi Aurus markalı avtomobili BMT Təhlükəsizlik Şurasının qətnamələrini pozur.
"Operativ Məlumat Mərkəzi-OMM" xəbər verir ki, bunu jurnalistlər üçün keçirdiyi növbəti brifinqdə ABŞ Dövlət Departamentinin mətbuat xidmətinin rəhbəri Metyu Miller bildirib.
"BMT Təhlükəsizlik Şurasının qətnamələri BMT-yə üzv olan bütün ölkələrdən KXDR-ə həm avtomobillərin, həm də dəbdəbəli avtomobillərin tədarükünə qadağa qoymağı tələb edir. Əgər bu doğrudursa, o zaman belə görünür ki, Rusiya özünün də BMT Təhlükəsizlik Şurasının qətnamələrini növbəti dəfə pozur”, – diplomat vurğulayıb.
Metyu Miller amerikalıları “saxlanma təhlükəsi” ilə bağlı hər hansı səbəbdən Rusiyaya getməməyə çağırıb.
"Heç bir ABŞ vətəndaşı hər hansı bir səbəbdən Rusiyaya səyahət etməyi düşünməməlidir, çünki onun saxlanılma riski var" - Miller jurnalistlər üçün keçirilən brifinqdə bildirib.
Miller əlavə edib ki, Birləşmiş Ştatlar Rusiya Federasiyasında saxlanılan Rusiya və ABŞ vətəndaşlığı olan şəxslərə konsulluq xidməti göstərməyə davam edəcək. “Bizim hazırda Rusiya hakimiyyət orqanları ilə o qədər də müntəzəm əlaqəmiz yoxdur, lakin səfirliyimiz bu məsələni mütəmadi olaraq diqqətdə saxlayır”.
