ABŞ nümayəndələri danışıqlar üçün Moskva və Kiyevə gedir

Ukrayna Prezidenti Volodimir Zelenski ABŞ nümayəndə heyətinin Rusiya və Ukraynaya səfər edərək münaqişənin həlli yollarını müzakirə edəcəyini bildirib.

“Operativ Məlumat Mərkəzi-OMM” xəbər verir ki, Zelenski “X” sosial şəbəkəsindəki paylaşımında danışıqlar qrupu ilə görüşdüyünü və amerikalı tərəfdaşlarla 24/7 rejimində əlaqə saxladıqlarını qeyd edib.

Məlumata görə, nümayəndə heyətinin səfərlərinin dəqiq tarixi açıqlanmasa da, tərəflər arasında ilkin razılaşmaların əldə olunduğu bildirilir.

Rusiya Prezidenti Vladimir Putin də münaqişənin həlli və sülh perspektivləri barədə danışıb. O, problemin həllinin ilk növbədə Rusiya və Ukraynanın öhdəliyində olduğunu bildirib və sülhə nail olmaq şansının mövcudluğunu vurğulayıb.

Bu arada, hərbi əməliyyatlar da davam edir. Məlumata görə, Ukraynaya məxsus PUA Rusiyanın Soçi şəhərində yerləşən neft anbarına hücum edib. Krasnodar vilayətinin rəsmiləri hadisə nəticəsində anbarda yanğın baş verdiyini təsdiqləyiblər.