ABŞ Mərkəzi Komandanlığı (CENTCOM) İrana qarşı həyata keçirilən son hərbi əməliyyat dalğasının başa çatdığını açıqlayıb.
“Operativ Məlumat Mərkəzi-OMM” xəbər verir ki, CENTCOM-un yaydığı bəyanata əsasən, əməliyyat zamanı ABŞ qüvvələri döyüş təyyarələri, pilotsuz uçuş aparatları və hərbi gəmilərdən istifadə edib.
Bildirilib ki, zərbələr İranın sahil müşahidə məntəqələrinə, hava hücumundan müdafiə sistemlərinə, hərbi logistika infrastrukturuna və dəniz qüvvələrinin imkanlarına qarşı yönəlib.
Məlumata görə, bu hücumlar silsiləsi artıq altıncı gecə davam edib. İran mediası isə zərbələr nəticəsində İranşehr hava limanı, Hamidiye şəhəri və Bəndər Abbasda yerləşən körpünün hədəfə alındığını bildirib.
Hazırda Yaxın Şərqdə 50 mindən çox ABŞ hərbçisinin xidmət etdiyi qeyd olunur. Həmçinin ABŞ ordusunun Oman körfəzinə əlavə qüvvələr yerləşdirdiyi bildirilir. Regionda gərginliyin bundan sonra necə inkişaf edəcəyi diqqətlə izlənilir.
