ABŞ Konqresinin Nümayəndələr Palatasının üzvləri impiçment prosesi çərçivəsində Prezident Cozef Baydenlə bağlı təhqiqatın davam etdirilməsi barədə qətnaməni dəstəkləyib.
"Operativ Məlumat Mərkəzi-OMM" xəbər verir ki, qətnaməni 221 konqresmen dəstəkləyib, 212-si isə sənədin əleyhinə səs verib.
Daha əvvəl Nümayəndələr Palatasının spikeri Mayk Conson qətnamənin “zəruri və məqsədəuyğun” olduğunu bildirib.
Bundan əvvəl isə o qeyd edib ki, bu səsvermə impiçment deyil, impiçment prosesi çərçivəsində istintaqı davam etdirməkdir. Mayk Conson Ağ Evin Bayden haqqında konqresmenlərin tələb etdiyi məlumatları verməkdən imtina etdiyi üçün bu cür tədbirlərin tələb olunduğunu izah edib. Səsvermədən sonra ABŞ Administrasiyasından Prezident haqqında lazımi məlumatları axtarmağın daha asan olacağını hesab edirlər.
Amerika mediası bildirir ki, Nümayəndələr Palatasının Milad tətilinə dekabrın 15-dən yanvarın 9-dək çıxacağı gözlənilir, ona görə də impiçment araşdırması məsələsi ona qədər həll edilməli idi.
