Süni zəka sahəsində hazırda böyük proseslər gedir və iki əsas istiqamət xüsusi önəm daşıyır: frontier modellərinin qurulması və tətbiqlərin hazırlanması.
"Operativ Məlumat Mərkəzi-OMM"-in məlumatına görə, bunu “Go-to-Market”in keçmiş rəhbəri Zak Kass Bakıda keçirilən "INMerge" İnnovasiya Sammitində bildirib.
Onun sözlərinə görə, ChatGPT-6 və ChatGPT-7 kimi yeni nəsil modellərin yaradılması və tətbiqi iqtisadi səmərəlilik prinsiplərinə əsaslanmalıdır.
Kass qeyd edib ki, hazırda ən azı üç böyük şirkət bu sahədə aktiv fəaliyyət göstərir və maraq xüsusilə tətbiq sahəsindədir.
Ekspert həmçinin vurğulayıb ki, infrastruktur, elm, tədqiqat və çip istehsalı sahəsində də irəliləyişlər var:
“Silikon vadisindən kənarda uğur qazanan regional şirkətlər mövcuddur. Azərbaycanda və ümumilikdə regionda bu sahədə inkişaf üçün geniş bazar var. Şirkətlər tətbiqlərin yaradılmasından başlasa, infrastrukturun formalaşdırılmasında da uğur əldə edə bilərlər”, - Zak Kass deyib.
O əlavə edib ki, data tətbiqləri, startap applikasiyaları və maşın öyrənməsi (ML) sahəsində də böyük potensial mövcuddur, lakin bütün bunların həyata keçirilməsi üçün ciddi investisiyalar tələb olunur.
