ABŞ Prezidenti Donald Trampın administrasiyasının, ABŞ vətəndaşlığına müraciət edən şəxslər üçün keçirilən imtahanları çətinləşdirməyi planlaşdırdığı bildirilib.
"Operativ Məlumat Mərkəzi-OMM" xəbər verir ki, bununla bağlı xarici KİV məlumat yayıb.
ABŞ Vətəndaşlıq və Miqrasiya Xidmətləri (USCIS) direktoru Cozef Edlou, Vaşinqtonda yerləşən Miqrasiya Araşdırmaları Mərkəzində keçirilən tədbirdə bu məsələ ilə bağlı açıqlama verib.
Edlou mövcud imtahanın çox asan olduğunu qeyd edərək, bu imtahanın ABŞ qanunlarına əsasən vətəndaşlıq almağa layiq olmayan şəxslərin belə miqrasiya prosesində irəliləməsinə şərait yaratdığını iddia edib.
O, imtahanın yalnız yüksək təhsilli namizədlərin keçə biləcəyi qədər çətin olmasını istəmədiyini vurğulasa da, testin daha düşündürücü və tələbkar olmasının vacibliyini qeyd edib.
Edlou həmçinin əlavə edib ki, gələcəkdə namizədlərdən "Amerikalı olmağın nə demək olduğunu" izah edən bir esse yazmaları da tələb oluna bilər.
Xəbərdə qeyd olunur ki, bu dəyişikliklərin yaxın zamanda qüvvəyə minməsi ehtimal olunmur. Lakin bu təkliflər Tramp administrasiyasının miqrasiya prosesini daha sərt və detallı şəkildə yoxlama siyasətinin bir hissəsi kimi qiymətləndirilir.
