ABŞ-ə qanuni immiqrasiyaya icazə verən və prezident Donald Trampın vəzifəyə gəldikdən sonra bağlamağa qərar verdiyi “CBP One” tətbiqindən istifadə edərək müvəqqəti olaraq ölkəyə gələnlərdən ölkəni tərk etmələri istənilib.
"Operativ Məlumat Mərkəzi-OMM" xəbər verir ki, bununla bağlı xarici KİV məlumat yayıb.
Bildirilib ki, Associated Press (AP) ABŞ-ın keçmiş prezidenti Co Bayden dövründə tətbiq edilən və 900 mindən çox insanın faydalandığı “CBP One” tətbiqi ilə ölkədə müvəqqəti yaşamaq icazəsi almış şəxslərə ABŞ Daxili Təhlükəsizlik Nazirliyinin (DHS) göndərdiyi elektron məktubu əldə edib.
Müvafiq olaraq, DHS-in ölkədə müvəqqəti yaşamaq hüququ verilmiş Honduraslı mühacir ailəsinə göndərdiyi e-poçtda qeyd olunub ki, Artıq sizin ABŞ-ı tərk etməyin vaxtı gəldi.
Eyni e-poçtu alan digər şəxslərin də sosial media hesablarında mövzu ilə bağlı paylaşımlar etdiyi görülüb.
