Almaniya bayrağı altında üzən və göyərtəsində min ton azot gübrəsi daşıyan qayıq Serbiya və Xorvatiya sərhədindəki körpüyə çırpılaraq Dunay çayında batıb.
"Operativ Məlumat Mərkəzi-OMM" xəbər verir ki, bu barədə Serbiya telekanalları məlumat yayıb.
Məlumata görə, “Antonia” yedək gəmisi göyərtəsində azot gübrəsi olan iki qayığı Avstriyanın Lints şəhərindən Serbiyanın Smederevo şəhərinə qədər Dunay çayı boyunca dartıb gətirib. Amma onlardan biri Serbiyanın Xorvatiya ilə sərhəddə yerləşən Baçka Palanka şəhəri yaxınlığında körpünün dayağına çırpılıb.
“Nəticədə “Lola 5” qayığında deşik yaranıb və o batıb, insan itkisi yoxdur. Körpüdə nəqliyyatın hərəkəti dayandırılıb. “Antonia” yedək gəmisi Baçka Palanka limanındadır”, - Serbiyanın tikinti, nəqliyyat və infrastruktur nazirinin müavini Predraq Petroviç milli televiziyaya açıqlamasında bildirib.
Hadisə yerində polis, prokurorluq, ekologiya müfəttişliyi işləyir, su nümunələri götürülüb. Körpüyə dəymiş ziyan və ətraf mühit üçün təhlükə müəyyən edilir.
