Ümumdünya Səhiyyə Təşkilatının (ÜST) baş direktoru Tedros Adhanom Qebreyesus Qəzzada atəşkəs dövründə minlərlə uşağın xəstəliklərə qarşı peyvənd olunmasını ümidverici bir addım kimi qiymətləndirib.
"Operativ Məlumat Mərkəzi-OMM" xəbər verir ki, bununla bağlı xarici KİV məlumat yayıb.
“Qəzzada atəşkəs davam edərkən minlərlə Qəzzalı uşağın artıq başqa bir təhlükəyə - peyvəndlə qarşısı alına bilən xəstəliklərə qarşı qorunması ümidvericidir”, - o qeyd edib.
Qebreyesus peyvəndləmə prosesində Səhiyyə Nazirliyi və yerli tibb işçiləri ilə birgə çalışan ÜST əməkdaşları ilə yanaşı BMT-nin Uşaq Fondu (UNICEF), BMT-nin Yaxın Şərqdəki Fələstinli Qaçqınlara Yardım və İşlər Agentliyi (UNRWA) və Qlobal Peyvənd və İmmunizasiya Alyansına (GAVI) bu qədər çox uşağa sağlamlıqları üçün ümid işığı təmin etdiklərinə görə təşəkkür edib.
Qebreyesus ÜST-ün tərəfdaşları ilə birlikdə peyvəndləmə mərhələlərinin davamını dəstəkləyəcəyini vurğulayıb.
Qidalanma çatışmazlığı yaşayan uşaqların müayinədən keçirildiyini və onlara tibbi yardım göstərildiyini qeyd edən Qebreyesus bildirib: “Qəzzanın gələcəyi onun gənclərinin sağlamlığından asılıdır”.
