İtaliya millisinin və "Latsio"nun futbolçusu Çiro İmmobile ağır yol qəzasına düşüb.
"Operativ Məlumat Mərkəzi-OMM"-in "RaiNews24" saytına istinadən məlumatına görə, hadisə bu gün paytaxt Romada baş verib.
33 yaşlı hücumçunun idarə etdiyi avtomobil tramvaya çırpılıb. Zərbənin gücündən maşının ön hissəsi tamamilə dağılıb. Tramvay isə zədələnərək relsdən çıxıb.
Hadisə zamanı təcrübəli forvardın qızı da avtomobildə olub. Lakin onlardan heç biri xəsarət almayıb. Tramvayın sürücüsü və iki sərnişini isə xəstəxanaya yerləşdiriliblər.
Polis hadisə yerində araşdırma aparır. Şahidlərin sözlərinə görə, qəzaya səbəb tramvayın işıqforun qırmızı işığında keçməsi olub.
