İspaniya hökuməti İsrailin Qəzza zolağını tamamilə işğal etmək planlarına qarşı kəskin mövqe sərgiləyib.
"Operativ Məlumat Mərkəzi-OMM" xəbər verir ki, bu barədə ölkənin xarici işlər naziri Xose Manuel Albares yerli "Onda Cero" radiostansiyasına müsahibəsində danışıb.
Nazirin sözlərinə görə, İspaniya Qəzzanın və ya İordan çayının qərb sahilinin hər hansı qeyri-qanuni anneksiyasını qətiyyətlə rədd edir.
O, Avropa İttifaqını da tənqid edərək bildirib ki, qurum bu məsələdə "çox az və çox gec hərəkət edib".
Albares Aİ ilə İsrail arasında imzalanmış assosiasiya sazişinin dayandırılması çağırışını da yenidən gündəmə gətirib:
“İsrail Qəzzada çox ciddi cinayətlər törədir və buna laqeyd qalmaq olmaz”.
Bu açıqlama, İsrail mediasında yayılan və baş nazir Binyamin Netanyahu hökumətinin Qəzza zolağının tam işğalına keçidi nəzərdən keçirdiyinə dair xəbərlər fonunda gəlib.
İsrailin nüfuzlu "Ynet" portalının məlumatına görə, siyasi rəhbərlik girovlarla bağlı danışıqların dalana dirənməsi səbəbilə, artıq diplomatik həll yolunu qeyri-mümkün sayır və bölgədə tam hərbi nəzarət planını ciddi şəkildə dəyərləndirir.
Hələlik baş nazir Netanyahu Qəzzanın tam işğalı ilə bağlı rəsmi açıqlama verməsə də, o dəfələrlə bəyan edib ki, müharibənin əsas məqsədi HƏMAS-ın hərbi-siyasi infrastrukturunu məhv etmək və bütün girovları geri qaytarmaqdır.
