Dələduzluqda şübhəli bilinən qazaxıstanlı Gürcüstandan ekstradisiya edilib.
"Operativ Məlumat Mərkəzi-OMM" Qazaxıstan KİV-ə istinadən xəbər verir.
Məlumata görə, həmin şəxs Tbilisidən Aktauya Baş Prokurorluq və Daxili İşlər Nazirliyinin əməkdaşları tərəfindən Qazaxıstanın Gürcüstandakı səfirliyinin köməyi ilə gətirilib.
İndi onu təkrar dələduzluq törətdiyinə görə cinayət məsuliyyətinə cəlb etmək niyyətindədirlər.
"Göstərilən şəxs 2020-ci ildə qabaqcadan əlbir olan şəxslər qrupu ilə subsidiyaların alınmasında köməklik göstərmək bəhanəsi ilə Ulıtau vilayətinin 88 sakininin pul vəsaitlərini ələ keçirib. Onlara ümumilikdə 30 milyon tengədən çox ziyan vurub. İki iştirakçı artıq müxtəlif cəza növlərinə məhkum edilib, şübhəli şəxs isə cinayəti törətdikdən sonra qaçıb gizlənib və buna görə də beynəlxalq axtarışa verilib", - Baş Prokurorluqdan bildirilib.
Hazırda şübhəli şəxs Aktau şəhərinin istintaq təcridxanasına yerləşdirilib. O üç ildən yeddi ilədək azadlıqdan məhrum edilə bilər. Eyni zamanda əmlak müsadirəsi cəzası nəzərdə tutulur.
