"BMT Təhlükəsizlik Şurasının (BMT TŞ) vəzifəsi münaqişələri uzaqdan izləmək deyil, vaxtında və prinsipial addımlarla qarşısını almaqdır".
"Operativ Məlumat Mərkəzi-OMM" xarici KİV-ə istinadən xəbər verir ki, bu sözləri Pakistanın Birləşmiş Millətlər Təşkilatındakı (BMT) daimi nümayəndəsi Asim İftixar Əhməd bildirib.
O, BMT TŞ-nin "Hindistan-Pakistan məsələsi" üzrə keçirilən fövqəladə qapalı iclasından sonra mətbuata açıqlama verib.
Cammu və Kəşmirin 70 ildən artıqdır ki, BMT Təhlükəsizlik Şurasının gündəmində olmasına baxmayaraq, münaqişənin hələ də həll edilmədiyini qeyd edən Əhməd deyib ki, bu vəziyyət münaqişələrin göz ardı edilə biləcəyini, lakin aradan qalxmayacağını, əksinə, daha da dərinləşəcəyini xatırladan ağrılı bir vəziyyətdir.
Əhməd Hindistanın ritorikasının, hərbi güc nümayişlərinin və təxribatçı hərəkətlərinin təkcə Pakistan üçün deyil, həm də regional və qlobal sülh üçün təhdid halına gəldiyinə də diqqət çəkib.
