Yenidən baxılan qanun layihəsində 2023-cü il dövlət büdcəsinin gəlirləri artırılmaqla müstəqillik tarixinin ən böyük göstəricisi olub, gəlirlərin əsas tərkib hissələri üzrə proqnoz göstəricilər 14 mənbə üzrə çox, 1 mənbə üzrə az olmuş, 6 mənbə sabit saxlanılıb.
"Operativ Məlumat Mərkəzi-OMM" xəbər verir ki, bu barədə Hesablama Palatasının “2023-cü il dövlət büdcəsi haqqında" qanunda dəyişiklik edilməsi barədə” qanun layihəsinə verdiyi Rəydə bildirilir.
Sənəddə deyilir ki, yenidən baxılma zamanı büdcə gəlirləri 33 779,5 milyon manat proqnozlaşdırılıb ki, bu da müstəqillik tarixində ən böyük məbləğ olmaqla, təsdiq edilmiş göstəriciyə nisbətən 9,8% çoxdur.
Yenidən baxılan dövlət büdcəsinin gəlirlərində nəzərdə tutulmuş 3 005,5 milyon manat artımın əsas hissəsinin hüquqi şəxslərin mənfəət vergisi, əlavə dəyər vergisi və DNF-dən transfertlərin artırılması hesabına təmin olunacağı gözlənilir.
