Avstraliya Sərhəd Qüvvələri ölkə tarixində ən böyük amfetamin müsadirəsini həyata keçirib.
"Operativ Məlumat Mərkəzi-OMM" xəbər verir ki, bu barədə ''TASS'' məlumat yayıb.
Xüsusi əməliyyat zamanı 900 kiloqrama yaxın psixoaktiv maddə müsadirə edilib.
Təxminən 64 milyon Avstraliya dolları (təxminən 41,8 milyon dollar) dəyərində narkotik daşınması konteynerlərə qablaşdırılıb. Təhlükəli yük Yeni Cənubi Uels əyalətindəki limanda saxlanılıb.
Hadisə ilə bağlı Avstraliya polisi araşdırma aparır.
Qeyd edək ki, bu, Avstraliya hüquq-mühafizə orqanlarının tonlarla ölçülən böyük bir narkotik partiyasını aşkarladığı ilk hadisə deyil. Keçən il dəniz yolu ilə qitəyə 2 tondan çox kokainin gətirilməsinə cəhd edilib. Polis müxtəlif ölkələrdən olan 11 kişi və iki azyaşlı ilə sui-qəsdin üstünü açıb. Nəticədə hadisəni törədən şəxslər saxlanılaraq məhkəmə qarşısına çıxarılıb. Avstraliya qanunlarına görə, onları ömürlük həbs gözləyir. Qadağan olunmuş yükün dəyəri o zaman 760 milyon Avstraliya dolları (494 milyon dollar) idi.
