Almaniya ölkə daxilində artan icazəsiz dron uçuşları və hava limanlarında yaranan fasilələrdən sonra polis qüvvələrinə zəruri hallarda pilotsuz uçuş aparatlarını (dronları) vurmaq səlahiyyəti verəcək yeni bir qanun layihəsi hazırlayıb.
"Operativ Məlumat Mərkəzi-OMM" xəbər verir ki, bununla bağlı xarici KİV məlumat yayıb.
Bildirilib ki, hökumət kabinəsi tərəfindən təsdiqlənən və parlamentin təsdiqinə təqdim olunacaq qanun layihəsi, “təcili təhlükə” və ya “ciddi zərər” hallarında polisin dronları vurmasını açıq şəkildə qanuni hala gətirir.
Yeni tənzimləməyə əsasən, polis yalnız odlu silahdan deyil, eyni zamanda lazer sistemləri və ya siqnal pozucu qurğular (jammer) vasitəsilə də dronların nəzarət və naviqasiya əlaqələrini kəsə biləcək.
Daxili işlər naziri Aleksandr Dobrindt, federal polis tərkibində xüsusi bir “əleyhdron birliyi” yaradılacağını açıqlayıb: “Ağac səviyyəsində uçan dronlara polis nəzarət edəcək, daha güclü və yüksək irtifada uçan modellərlə isə ordu məşğul olacaq.”
Almaniya texnologiya sahəsində məsləhətləşmə məqsədilə İsrail və Ukrayna ilə əməkdaşlıq etməyi də planlaşdırır.
