Amerika Birləşmiş Ştatları Dövlət Departamenti bəzi turist və ticarət vizaları üçün 15 min dollara qədər girov tətbiqini nəzərdə tutan yeni pilot proqram başladıb.
"Operativ Məlumat Mərkəzi-OMM" xarici KİV-ə istinadən xəbər verir ki, yeni tətbiq, viza müddətini pozma halları yüksək olan ölkələrdən gələn ziyarətçilərə şamil ediləcək.
Federal Qeydiyyat Sistemində 5 avqustda dərc olunacaq müvəqqəti yekun qayda layihəsinə əsasən, bu proqram 12 aylıq sınaq mərhələsi kimi həyata keçiriləcək.
Qeyd edək ki, bu təşəbbüs ilk dəfə 2020-ci ilin noyabrında, Donald Tramp administrasiyası dövründə gündəmə gəlmişdi. Həmin vaxt əsasən Afrika qitəsindən olan, viza rejimini pozma faizi 10%-dən yuxarı olan təxminən 24 ölkənin vətəndaşlarından 15 min dollarlıq girov alınması planlaşdırılmışdı. Lakin həmin proqram heç vaxt reallaşdırılmamışdı.
Yeni qaydalarla bağlı təfərrüatlar və hansı ölkələrin əhatə olunacağı yaxın günlərdə açıqlanacaq.
