Ukrayna, ABŞ və Rusiya arasında növbəti üçtərəfli görüşün Əbu-Dabidə keçirilməsi gözlənilir.
“Operativ Məlumat Mərkəzi-OMM” xəbər verir ki, bu barədə xarici KİV məlumat yayıb.
Məlumata görə, Ukrayna Prezidenti Volodimir Zelenski axşam video müraciətində bildirib ki, növbəti üçtərəfli formata hazırlıq artıq daha geniş şəkildə aparılır.
“Növbəti üçtərəfli formata artıq daha böyük hazırlıq var. Növbəti görüş, çox güman ki, Əmirliklərdə, xüsusən də Əbu-Dabidə keçiriləcək. Formatın martın əvvəlində toplanacağını gözləyirik”, – deyə Zelenski vurğulayıb.
Ukrayna lideri qeyd edib ki, real təhlükəsizlik zəmanətlərinin təmin olunması üçün əldə edilən bütün razılaşmalar yekunlaşdırılmalı və üç ölkə liderinin görüşü hazırlanmalıdır. Onun sözlərinə görə, bu format müharibəyə son qoymaq üçün aparılan danışıqlar kontekstində “çox şeyi həll edə bilər”.
Zelenski həmçinin Rusiyanın sülhə hazır olmadığını bildirib və Rusiya rəhbərliyinin “döyüş maşınını dayandırdığına” dair heç bir əlamət görmədiyini qeyd edib. O əlavə edib ki, Moskvaya təzyiq davam etdirilməlidir.
“Həm Amerika, həm də Avropa ilə həqiqətən işləyə biləcək bütün mümkün təzyiq və diplomatik formatları müzakirə edirik. Tərəfdaşlarımızın qətiyyətli qalması çox vacibdir. Bu gün komandaya aşağıdakı direktivləri təqdim etdim – nəyə nail olmalı olduğumuz”, – deyə Ukrayna Prezidenti bildirib.
