OMM Redaksiyası
Ukrayna Prezidenti Volodimir Zelenski dronları ələ keçirmək üçün nəzərdə tutulan yeni silahın sınaqdan keçirildiyini açıqlayıb.
Zelenskinin sözlərinə görə, yeni sistemlə gecə saatlarında uğurlu zərbə qeydə alınıb.
Ukrayna lideri həmçinin bildirib ki, Rusiya dronları Moldovanın hava məkanına daxil olub. O, bu barədə ABŞ-ın "CBS" televiziya şəbəkəsinə müsahibəsində danışıb.
Zelenski həmin vaxt Moldovanın paytaxtı Kişinyov hava limanında olduğunu, xarici səfərə gedərkən və səfərdən qayıdarkən insidentlərin baş verdiyini deyib.
“Moldovada prezident təyyarəm orada idi və buna görə də Moldovaya, Moldovanın hava məkanına hücum etdilər. Bəlkə də şəxsən mənə hücum etmək istəmirdilər”, – Zelenski bildirib.
O əlavə edib ki, Ukraynaya qayıdarkən Kişinyovdan keçdikləri zaman eyni hal yenidən baş verib.
Digər məlumatda isə ABŞ Ədliyyə Nazirliyi Rusiya kəşfiyyat xidmətləri ilə əlaqəli olduqları iddia edilən beş nəfərə qarşı ittiham irəli sürüb. İttihamnaməyə əsasən, həmin şəxslər ABŞ da daxil olmaqla dünyanın müxtəlif yerlərində hücumlar və qətllər törətmək üçün fəaliyyət göstəriblər.
ABŞ-ın baş prokuroru Todd Blanche bildirib ki, planlar arasında Vaşinqton ərazisində olduğu güman edilən rusiyalı dissidentin öldürülməsi cəhdi də olub. İttiham olunan şəxslərin hazırda azadlıqda olduğu qeyd edilib.
