Afət Ziyadqızı
Rusiya Federasiyası Qərbi Avropa və ya Avropa İttifaqı (Aİ) tərəfindən hər hansı təcavüzaktı baş verəcəyi təqdirdə adekvat cavab tədbirləri görəcək. Bu barədə Rusiya Xarici İşlər Nazirliyinin (XİN) rəsmi nümayəndəsi Mariya Zaxarova keçirdiyi brifinqdə bildirib.
"Operativ Məlumat Mərkəzi-OMM" xəbər verir ki, Zaxarova Rusiyanın mövqeyinin Rusiya Prezidenti Vladimir Putinin müvafiq bəyanatlarında dəqiq və açıq şəkildə ifadə olunduğunu diqqətə çatdırıb.
Diplomat Moskvanın heç bir tərəfi hədələmədiyini vurğulayaraq, Rusiyanın Qərbi Avropa ölkələri ilə hərbi münaqişəyə girmək planlarının olmadığını, bu fikrin həm Prezident Vladimir Putin, həm də xarici işlər naziri Sergey Lavrov tərəfindən dəfələrlə bəyan edildiyini xatırladıb.
Mariya Zaxarova, həmçinin Aİ rəsmilərinin Rusiyanı sübutsuz şəkildə "hibrid hücumlar"da ittiham etməsinə münasibət bildirib. Rusiya XİN rəsmisinin sözlərinə görə, bu cür əsassız iddialar yalnız Avropadakı daxili problemlərdən ictimaiyyətin diqqətini yayındırmağa xidmət edir.
"Avropa İttifaqında öz yanlış siyasi və iqtisadi hesablamaları üzündən böhran dərinləşdikcə, Rusiyaya qarşı daha genişmiqyaslı planlar şamil edilməyə çalışılır", – deyə diplomat əlavə edib. Zaxarova vurğulayıb ki, Avropa İttifaqının Moskva ilə qarşıdurma xəttini seçməsi Avropanın mövcud problemlərini daha da ağırlaşdıracaq.
