OMM Redaksiyası
Litva futbol millisinin baş məşqçisi Edqaras Yankauskas UEFA Millətlər Liqasının qrup mərhələsində Azərbaycanla keçirilən oyundan sonra fikirlərini bölüşüb. Bakıda baş tutan qarşılaşma Azərbaycan millisinin 1:0 hesablı qələbəsi ilə başa çatıb.
Yankauskas meydanda səviyyəcə bir-birinə yaxın iki komandanın mübarizə apardığını deyib. Onun sözlərinə görə, Litva millisi yaratdığı qol imkanlarından yararlana bilməyib, Azərbaycan yığması isə fürsətini daha yaxşı dəyərləndirib. Baş məşqçi rəqibini qələbə münasibətilə təbrik edib.
Litva millisinin çalışdırıcısı nəticədən sonra qrupda birinci yer uğrunda mübarizənin artıq yalnız öz komandalarından asılı olmadığını qeyd edib.
Yankauskas matçın hakimliyindən narazı qaldığını da bildirib. O, bir sıra qərarların Azərbaycan millisinin xeyrinə verildiyini düşünür və buraxılan qoldan əvvəl rəqib futbolçunun qayda pozuntusuna yol verdiyini iddia edir. Baş məşqçinin fikrincə, görüş ərzində bəzi epizodlarda hakim Azərbaycan komandasına daha çox simpatiya göstərib.
