Bakının Xətai rayonunda suyun verilməsində fasilə yaranacaq.

"Operativ Məlumat Mərkəzi-OMM" bu barədə Dövlət Su Ehtiyatları Agentliyinin İri Şəhərlərin Birləşmiş Su Təchizatı Xidmətinə istinadən xəbər verir.

Məlumata görə, magistral su kəməri üzərində aparılacaq təmir işləri ilə əlaqədar sentyabrın 23-də saat 12:00-dan sentyabrın 24-ə saat 12:00-dək Xətai rayonunun bəzi ərazilərinə suyun verilməsində fasilə yaranacaq.

Transxəzər Beynəlxalq Nəqliyyat Marşrutu (Orta Dəhliz) ilə bağlı əsas problemlərdən biri vahid rəqəmsal platformanın olmamasıdır.

"Operativ Məlumat Mərkəzi-OMM" xəbər verir ki, bunu "Azərbaycan Dəmir Yolları" QSC-nin (ADY) sədrinin rəqəmsallaşma və beynəlxalq investisiyalar üzrə müşaviri Arif Ağayev Bakıda keçirilən "Avrasiya Nəqliyyat Marşrutu" Beynəlxalq Assosiasiyasının qurulmasına dair dəmiryol administrasiyaları rəhbərlərinin məşvərət toplantısında bildirib.

"Bu vahid platforma müxtəlif rəqəmsal sistemləri inteqrasiya edə bilərdi. Layihədə iştirak edən ölkələr bu istiqamətdə rəqəmsallaşma ilə bağlı fərqli səviyyələrdə yerləşirlər. Bu isə məlumat mübadiləsi və yüklərin izlənilməsinə dair vahid sistemin tətbiqini çətinləşdirir. Vahid rəqəmsal platformanın olmaması nəticəsində iştirakçı ölkələr arasında koordinasiya ciddi şəkildə qəlizləşir. Bu isə bütün səviyyələrdə tədarük zəncirlərində gecikmələrə səbəb olur", - deyə o qeyd edib.

Qeyd edək ki, Orta Dəhlizin cəlbediciliyini və rəqabət qabiliyyətini artırmaq üçün onun bütün uzunluğu boyunca vahid multimodal xidmət yaradılıb. Azərbaycan və Qazaxıstan dəmir yollarının informasiya sistemləri artıq DTC (Digital Trade Corridor) platformasının gömrük modulu olan "Tez Customs" ilə inteqrasiya olunub, Gürcüstan dəmir yolları ilə də oxşar iş planlaşdırılır. Orta Dəhliz üzrə əməliyyatların səmərəliliyini artırmaq üçün onun rəqəmsallaşdırılması işləri də aparılır. 2025-ci ildə "Maneəsiz Rəqəmsal Dəhliz" platformasının işə salınması planlaşdırılır ki, bu da bütün marşrut boyunca sənəd dövriyyəsini, gömrük rəsmiləşdirilməsini və yüklərin izlənməsini vahid ekosistemə birləşdirəcək.

Bakı ərazisində və şəhər ətrafında küçə və yolların təmiri ilə bağlı Azərbaycan Avtomobil Yolları Dövlət Agentliyi tərəfindən kompleks tədbirlər icra olunur.

"Operativ Məlumat Mərkəzi-OMM" Agentliyə istinadən xəbər verir ki, xüsusən paytaxt Bakı ərazisində yay tətili dönəmində hərəkət intensivliyinin azalmasından istifadə edilərək 20 ünvanda (küçə və prospekt) təmir işləri sürətlə və keyfiyyətlə icra olunaraq yeni tədris ilinin başlanılmasına qədər yekunlaşdırılıb.

Bunlar Səbail rayonunda Teymur Elçin və Mehdi Hüseyn küçələri, Nərimanov rayonu, Atatürk prospekti, Yasamal rayonu Parlament prospekti (Mehdi Hüseyn küçəsindən M.Müşfiq küçəsinədək), Mikayıl Müşfiq küçəsi (Mətbuat prospektindən İ.Qutqaşınlı küçəsinədək), Azadlıq prospekti (Cəfər Xəndan küçəsindən Koveriçkin küçəsinədək), Xaqani küçəsi (Aleksandr Puşkin küçəsindən Kövkəb Səfərəliyeva küçəsinədək), Əhməd Rəcəbli küçəsi (Akademik Həsən Əliyev küçəsindən Təbriz küçəsinədək), Əhmədbəy Ağaoğlu küçəsi (F.X.Xoyski küçəsindən Xətai prospektinədək), Zərifə Əliyeva küçəsi (Kövkəb Səfərəliyeva küç-dən Aleksandr Puşkin küçəsinədək), Əhməd Rəcəbli küçəsi (Z.Bünyadov prospektindən C. Xəndan küçəsinədək), 28 May küçəsi (Kövkəb Səfərəliyeva küçəsindən Rəşid Behbudov küçəsinədək), Mikayıl Müşfiq küçəsi ("Qurd" qapısından Bakı Şəhər DYP İdarəsinədək), Nizami küçəsi (Rəşid Behbudov küçəsindən Kövkəb Səfərəliyeva küçəsinədək), Nizami küçəsi (Azərbaycan prospektindən Səid Rüstəmov küçəsinədək), Suraxanı rayonu, Səttar Bəhlulzadə küçəsi (Atəşgaha gedən yol), Dilarə Əliyeva küçəsi (Kövkəb Səfərəliyeva küçəsindən Bülbül prospektinədək), Mirzəağa Əliyev küçəsi (Azərbaycan prospektindən Səməd Vurğun küçəsinədək), Mətbuat prospekti və Həsənbəy Zərdabi küçəsidir.

Yay tətili zamanı başlanılan və yeni tədris ilinin başlanılmasına qədər təmiri yekunlaşdırılmış küçə və prospektlərin ümumi uzunluğu 27 390 metr təşkil edir.

Bundan başqa 3 ünvanda təmir işləri yay tətilindən öncə başlanılaraq yekunlaşdırılıb. Bunlar Əhməd Rəcəbli küçəsi (Z.Bünyadov pr-dən Ak.Həsən Əliyev küçəsinədək), Beynəlxalq Avtovağzaldan Xarici dairəvi avtomobil yoluna çıxışı və Zığ şosesində Beton yoludur.

1 ünvanda isə - Mehdiabad-Digah-Məhəmmədli avtomobil yolunda (Yanardağa gedən yol) təmir işlərinə tətil zamanı başlanılıb və sentyabrın 17-də yekunlaşdırılıb.

Qeyd olunan ərazilərin ümumi uzunluğu 12 min metrdən artıqdır.

Hazırda təmir işləri 3 ünvanda - 8 Noyabr prospekti, Salyan şosesi (Bibi-Heybət şosesindən Lökbatan dairəsinədək) və Şamaxı yoluna çıxış (DYP-nin Ekologiya postundan Hökməli dairəsinədək) davam etdirilir ki, bu ərazilərdə işlərin yaxın günlərdə yekunlaşdırılması planlaşdırılır.

Təmiri davam edən ərazilərin ümumi uzunluğu 18 740 metr təşkil edir.

Bakının bir sıra yollarında nəqliyyatın sıxlığı müşahidə edilir.

Bu barədə "Operativ Məlumat Mərkəzi-OMM"-ə DİN-in Nəqliyyatı İntellektual İdarəetmə Mərkəzindən bildirilib.

Hazırda:

1. Heydər Əliyev prospekti, əsas yol, mərkəz istiqamətində;

2. Heydər Əliyev prospekti, köməkçi yol, mərkəz istiqamətində;

3. Babək prospekti, mərkəz istiqamətində;

4. 8 Noyabr prospekti, Süleyman Əhmədov küçəsi ilə kəsişmədən mərkəz istiqamətində;

5. Bakı-Sumqayıt şosesi, "20 Yanvar" metrostansiyası istiqamətində;

6. Alı Mustafayev küçəsi, Ziya Bünyadov prospekti istiqamətində;

7. Tbilisi prospekti, "20 Yanvar" metrostansiyasından mərkəz istiqamətində;

8. Ziya Bünyadov prospekti, Müzəffər Nərimanov küçəsi ilə kəsişmədən "20 Yanvar" metrostansiyası istiqamətində sıxlıq müşahidə olunur.

Qazaxıstanın Baş naziri Oljas Bektenov sentyabrın 19-da Astanada Gürcüstanın Baş nazirinin birinci müavini - iqtisadiyyat və davamlı inkişaf naziri Levan Davitaşvili ilə görüşdə Transxəzər Beynəlxalq Nəqliyyat Marşrutu (TBNM) daxil olmaqla tranzit-nəqliyyat sahəsində əməkdaşlığı müzakirə edib.

"Operativ Məlumat Mərkəzi-OMM" bu barədə Qazaxıstan hökumətinin mətbuat xidmətinə istinadən xəbər verir.

“Qazaxıstan və Gürcüstan TBNM-in inkişafı çərçivəsində fəal əməkdaşlıq edirlər. Bu marşrut üzrə yüklərin daşınması ötən il 65 %, bu ilin 8 ayında isə 69 % artaraq 2,9 milyon tona çatıb. Dövlət başçısı Orta Dəhlizin inkişafına böyük diqqət yetirir və biz bu marşrut üzrə daşımaların həcmini 10 milyon tona çatdırmağı hədəfləyirik”, - Qazaxıstanın Baş naziri bildirib.

O.Bektenov, həmçinin TBNM marşrutu üzrə, o cümlədən Bakı-Tbilisi-Qars xətti üzrə rəqabətqabiliyyətli tarif şərtlərinin yaradılması, daşınma müddətlərinin azaldılması və daşımaların həcminin artırılması istiqamətində birgə işlərin davam etdirilməsinin vacibliyini qeyd edib. Bununla yanaşı, nəqliyyat dəhlizinin aktiv rəqəmsallaşdırılması zərurəti də qeyd olunub ki, bu da onun beynəlxalq daşıyıcılar üçün cəlbediciliyini artıracaq.

Görüş zamanı O.Bektenov və L.Davitaşvili kənd təsərrüfatı, enerji, turizm, aviasiya sənayesi və mədəni-humanitar əlaqələrin gücləndirilməsi sahələrində əməkdaşlıq məsələlərini də müzakirə ediblər.

Qeyd olunub ki, Gürcüstan Qazaxıstanın Cənubi Qafqazda mühüm və etibarlı tərəfdaşıdır. Bu ilin birinci rübündə gürcü investorları Qazaxıstan iqtisadiyyatına 88,5 milyon ABŞ dollar investisiya yatırıb, cəmi 10 il ərzində onların həcmi 500 milyon ABŞ dollarını ötüb.

Xatırladaq ki, Orta Dəhliz kimi tanınan TBNM Çin, Qazaxıstan, Azərbaycan, Gürcüstan və Türkiyədən keçməklə Avropa ölkələrinə qədər uzanır. Bakı-Tbilisi-Qars dəmir yolu xətti dəhlizin bir hissəsidir.

Sentyabrın 21-də, saat 21:00-dan etibarən Bakının Nəsimi rayonunun Kövkəb Səfərəliyeva küçəsində aparılacaq təmir işləri ilə əlaqədar işlərin aparıldığı zolaqlar üzrə avtonəqliyyat vasitələrinin hərəkəti qismən məhdudlaşdırılaraq digər zolaqlara yönləndiriləcək.

"Operativ Məlumat Mərkəzi-OMM" bu barədə Azərbaycan Avtomobil Yolları Dövlət Agentliyinə istinadən xəbər verir.

"Sürücülərdən aparılan işlərə anlayışla yanaşmaları sözügedən hissədə hərəkətdə olarkən diqqətli olmaları, təmir ərazisində qoyulacaq müvəqqəti yol nişanlarının tələblərinə və yol hərəkəti qaydalarına riayət etmələri xahiş olunur",-deyə məlumatda qeyd edilib.