Xamenei: “ABŞ İslam Respublikasını məhv edə bilməyəcək”

İranın Ali Rəhbəri Ayətullah Seyid Əli Xamenei ABŞ Prezidenti Donald Trampın Amerika hərbi gücü ilə bağlı iddialarına kəskin reaksiya verib.

"Operativ Məlumat Mərkəzi-OMM" xəbər verir ki, Ali Rəhbər ABŞ-nin hərbi qüdrətinin sarsılmaz olmadığını vurğulayıb:

“Onlar ordularının dünyanın ən güclüsü olduğunu deyirlər. Lakin ən güclü ordu belə bəzən elə bir zərbə ala bilər ki, bir daha ayağa qalxa bilməz”.

O, ABŞ-nin İran sularına hərbi gəmilər göndərmək təhdidlərinə toxunaraq, həmin gəmiləri dənizin dibinə qərq edə biləcək silahların daha təhlükəli olduğunu qeyd edib.

Xamenei həmçinin ABŞ Prezidentinin son çıxışlarından birinə diqqət çəkib.

“Prezident etiraf edib ki, 47 ildir Amerika İslam Respublikasını sıradan çıxara bilmir. Bu, mühüm bir etirafdır və mən deyirəm: Siz bundan sonra da bunu bacarmayacaqsınız. İran xalqı öz islami və şiəlik dərslərini yaxşı bilir və heç vaxt korrupsiyalaşmış rəhbərlərə beyət etməyəcək”.