Ağ Ev rəhbəri Donald Tramp yaxın gələcəkdə Yaxın Şərqdəki hərbi əməliyyatları dayandırmaq niyyətində deyil və İrana qarşı əməliyyat daha bir neçə həftə uzana bilər.
“Operativ Məlumat Mərkəzi-OMM” xəbər verir ki, bu barədə "The Wall Street Journal" (WSJ) qəzeti məlumatlı mənbələrə istinadən yazıb.
İrana qarşı əməliyyatlar niyə uzanır? Tramp və Pentaqonun mövqeyi
Mənbələrin məlumatına görə, dövlət başçısının bir sıra məsləhətçiləri onu əməliyyatı başa çatdırmağa inandırmağa çalışırlar. Lakin Tramp İrana və İran yönümlü birləşmələrə qarşı zərbələri davam etdirməkdə qərarlıdır.
Nəşr diqqətə çatdırıb ki, bu mövqe prezidentin Amerika Silahlı Qüvvələrinin qarşıya qoyulmuş vəzifələrin öhdəsindən praktiki olaraq gəldiyi barədə rəsmi ritorikası ilə ziddiyyət təşkil edir.
Pentaqonda isə hesab edirlər ki, münaqişənin aktiv fazası azı daha bir neçə həftə davam edəcək.
Sürətli qələbə gözləntisi və ABŞ iqtisadiyyatı üçün staqflyasiya riski
Qəzetin mənbələri bildiriblər ki, Tramp hərbi kampaniyanın başlaması barədə əmr verərkən Amerika ordusunun İslam Respublikası üzərində sürətli və qeyd-şərtsiz qələbə qazanmağa qadir olduğuna əmin idi. Prezident 2025-ci ildə İranın nüvə obyektlərinə endirilən zərbələrin uğurundan, eləcə də Venesueladakı hərbi əməliyyatdan ilhamlanıb.
Bununla belə, İrana qarşı hərbi əməliyyatların aparılması Birləşmiş Ştatlara hər həftə milyardlarla dollara başa gəlir. Münaqişənin uzunmüddətli və daha genişmiqyaslı regional qarşıdurmaya çevrilmək riski var ki, bu da Amerika iqtisadiyyatına ciddi zərbə vura və staqflyasiyaya səbəb ola bilər.
Fevralın 28-də nə baş vermişdi? SEPAH-ın cavab zərbələri
Xatırladaq ki, ABŞ və İsrail fevralın 28-də İrana qarşı hərbi əməliyyata başlayıb.
Buna cavab olaraq, SEPAH genişmiqyaslı əməliyyata başladığını açıqlayıb və İsrail, Bəhreyn, İordaniya, Qətər, Küveyt, BƏƏ və Səudiyyə Ərəbistanındakı obyektlərə hücum edib.
