Vladimir Putin və Məsud Pezeşkian Bişkekdə görüşüblər

Rusiya Prezidenti Vladimir Putin Qırğızıstanın paytaxtı Bişkekdə İran Prezidenti Məsud Pezeşkian ilə görüşüb.

“Operativ Məlumat Mərkəzi – OMM” xəbər verir ki, Şanxay Əməkdaşlıq Təşkilatının (ŞƏT) sammitində iştirak etmək üçün Bişkekə səfər edən Putin tədbir çərçivəsində bir sıra ikitərəfli görüşlər keçirib.

Danışıqlar “Alaş-Arça” dövlət iqamətgahında baş tutub. Görüşdə Rusiya nümayəndə heyətinin tərkibində xarici işlər naziri Sergey Lavrov, baş nazirin müavini Aleksey Overçuk, Prezident Administrasiyası rəhbərinin müavini Maksim Oreşkin, Prezidentin mətbuat katibi Dmitri Peskov və “Rosatom”un rəhbəri Aleksey Lixaçev iştirak ediblər.

Məlumata görə, iki liderin son görüşü ötən ilin dekabrında Türkmənistanda baş tutub.

Rusiya Prezidentinin köməkçisi Yuri Uşakov görüşdən əvvəl bildirib ki, Putin və Pezeşkiyan arasında keçirilən danışıqlar xüsusilə Yaxın Şərqdə mövcud gərginlik fonunda mühüm əhəmiyyət daşıyır.

Görüş zamanı regional təhlükəsizlik məsələləri, Yaxın Şərqdəki vəziyyət və İran ətrafında yaranmış geosiyasi proseslərin müzakirə edildiyi bildirilir.