Azərbaycanın veteran futbolçusu Vidadi Rzayev Andorra ilə yoldaşlıq oyunu öncəsi millinin qələbə qazanmalı olduğunu deyib. O, Lixtenşteynlə qarşılaşmada yaradılan çoxsaylı qol imkanlarından yalnız birinin dəyərləndirildiyini xatırladıb və bu dəfə fərqli mənzərə gözlədiyini bildirib.
Rzayevin fikrincə, Azərbaycan millisi favorit olsa da, bunu meydanda sübut etməlidir. Rəqibin sıx müdafiəsini yarmaq üçün səbirli və hücumameyilli oyun, yaradılan fürsətlərdən isə maksimum istifadə lazımdır. Veteran futbolçu Ayxan Abbasovun işini müsbət qiymətləndirib, həmçinin klublarda legionerlərə yerli oyunçulardan daha çox üstünlük verilməsinin çətinlik yaratdığını qeyd edib.
Rzayev millidə son matçına çıxacaq kapitan Emin Mahmudovun xidmətlərini yüksək qiymətləndirib. O bildirib ki, milli karyeranı başa vurmaq çətin hissdir və Mahmudovun yığmada gördüyü işlər danılmazdır. “Əvəzolunmaz futbolçu yoxdur. Emindən əvvəl də biz oynayırdıq, bizdən sonra Emin kimi futbolçular gəldi. Amma hazırda millidə Mahmudov səviyyəsində oyunçu görmürəm”, – deyə Rzayev əlavə edib.
Enkamp şəhərində keçiriləcək Azərbaycan – Andorra oyunu Bakı vaxtı ilə saat 22:00-da başlayacaq. Bu, Emin Mahmudovun Azərbaycan millisində sonuncu matçı olacaq.